Ўзбекистонда ёз мавсумигача неча киши чўкиш билан боғлиқ бахтсиз ҳодисага учрагани маълум қилинди

Фавқулодда вазиятлар вазирлиги 26 май куни АОКАда ўтказилган матбуот анжуманида ёз мавсуми билан боғлиқ бахтсиз ҳодисалар ҳақида маълумот берди.

Қайд этилишича, 2021 йилнинг 25 майига қадар ҳудудий Фавқулодда вазиятлар бошқармалари сувда қутқарув гуруҳлари томонидан жами 26 нафар фуқаронинг чўкиши билан боғлиқ бахтсиз ҳодисаларга чиқишлар амалга оширилган.

«Улардан 3 нафари чўмилиб, 12 нафари чўкканликда гумон қилинган, 16 нафари эҳтиётсизлик оқибатида, 1 нафари ўз жонига қасд қилиш ва 1 нафари жиноят оқибатида чўкканларга тўғри келади. Энг ачинарлиси, ушбу чўкишларнинг 14 нафари (38,5 фоизи) вояга етмаганлар ҳисобланади», — деган ФВВ ахборот хизмати бошлиғи ўринбосари Самандар Ҳикматуллаев.

Унинг сўзларига кўра, 2020 йилда жами 165 та чўкиш билан боғлиқ бахтсиз ҳодисага чиқишлар қайд этилган бўлиб, булардан 57 таси чўмилиш қоидаларига амал қилмаслик оқибатида сувда чўкиш, 40 таси чўкишда гумон қилинганлар, 58 нафари эҳтиётсизлик оқибатида чўкиш, 6 нафари ўз жонига қасд қилиш ва 4 нафари жиноят оқибатида чўкишларга тўғри келади. Ушбу чўккан фуқароларнинг 56 нафари (34 фоизи)ни вояга етмаганлар ташкил қилади.

Чўмилиш мавсумида хавфсизликни таъминлаш бўйича аҳоли орасида тарғибот-ташвиқот ишларининг амалга оширилиши ҳам аҳоли, айниқса, ёшларнинг билимларини оширишга хизмат қилиб, огоҳликка чақиришда катта ўрин тутади. Айни йўналишда 2020—2021 йилларнинг шу кунига қадар республика бўйича 419 та семинар ва 18 615 та суҳбат ташкил қилиниб, 496 534 та эслатма тарқатилган.

Матбуот анжуманида, шунингдек, аҳоли дам олиш учун тоғга чиқиши билан боғлиқ, хусусан, тоғли ҳудудларда йўқолиб қолиш ёки тупроқ кўчки каби табиат ҳодисасига дуч келиш каби кўнгилсиз ҳодисалар юз бериши эҳтимоли юқорилиги ҳам айтиб ўтилган.

Тошкент шаҳар ФВБ матбуот хизмати чўкиш билан боғлиқ кўнгилсизликларнинг олдини олиш учун қуйидагиларга эътибор бериш лозимлигини эслатиб ўтган:

• тақиқловчи белгилар бор ҳудудларда чўмилмаслик;
• болаларни сув ҳавзалари, анҳор ва кўлларга назоратсиз юбормаслик;
• сузишни билмаганларнинг чуқур бўлган сув ҳавзаларида чўмилмаслиги;
• чўмилиш вақтида сувнинг совуқлиги ва тезлигини ҳисобга олиш;
• чўмилиш учун махсус белгиланган сув ҳавзаларидан фойдаланиш;
• спиртли ичимликлар истеъмол қилиб, чўмилишга бормаслик.