“IIO xodimlari ayblanuvchilarning pul va moddiy boyliklarini olib qo‘ygani haqidagi xabarlar asossiz”. “Murodboy ishi” bo‘yicha qo‘shimcha ma’lumot berildi

Sud zalidagi bir nechta fuqaro qo‘llarini kesib, IIB xodimlari bilan tortishgani aks etgan video ijtimoiy tarmoqlarda tarqaldi. Videoning izohida aytilishicha, huquqni muhofaza qilish idoralari “Murodboy ishi” doirasida ayblanuvchilarga tegishli 3 kilogramm oltin, 6 milliard so‘m va qimmatbaho mashinalarni o‘zlashtirgan. Hodisa haqida Toshkent viloyati ichki ishlar boshqarmasi izoh berdi.

Boshqarma ma’lumotlariga ko‘ra, video 25-may kuni Jinoyat ishlari bo‘yicha Yangiyo‘l shahar sudida o‘tkazilgan besh fuqaro ustidan olib borilgan sud jarayonida olingan. Ayblanuvchilardan uch nafari Jinoyat kodeksining 168-moddasi 3-qismining “v” bandi (o‘ta katta miqdordagi firibgarlik) va boshqa moddalari bilan turli muddatlarga hukm qilingan.

Ayblanuvchi Mirzamurod Yunusaliyev (9 yil 2 oyga hukm qilingan), G‘ofurjon Murodjonov (7 yil) va Amiran Qudratov (8 yil) sud jarayonida lezviya bilan chap bilaklarini kesib tashlagan, deyiladi IIB bayonotida.

Boshqarmaning ta’kidlashicha, “ayblanuvchilarning pul va moddiy boyliklari IIO xodimlari tomonidan olib qo‘yilgan degan xabarlar mutlaqo asossiz”.

Hozirda vaziyat nazorat ostida, hodisa sabablari o‘rganilmoqda.

Ma’lumotlarga ko‘ra, ular 2015-yilga qadar chinozlik Ahmadboyning yordamchilaridan bo‘lgan va xalq orasida Murodboy nomi bilan tanilgan Mirzamurod Yunusaliyev ishiga aloqadorligi yuzasidan sudga chaqirilgan. Mahbuslar soat 20:00 larda 1-son tergov hibsxonasiga olib borib topshirilgan.

Tergov harakatlari davomida M.Yunusaliyev 2016-yil yanvar oyida “Erkin avto diller” nomli MChJ zamirida moliyaviy piramida tashkil etib, bu ishga o‘zining o‘nga yaqin jinoiy sheriklarini jalb qilgani, ular yordamida 6636 ta holatda 4000 nafarga yaqin fuqaroning 26 million 870 ming 51 AQSh dollari va 18 milliard so‘m miqdordagi pul va boshqa mol-mulklarini firibgarlik yo‘li bilan qo‘lga kiritgani aniqlangan.

Jinoyat ishi bo‘yicha qariyb 8 milliard so‘mlik 18 ta ko‘chmas mulk obyektlari (uy, choyxona, do‘kon binosi, noturar bino va inshootlar) xatlangan. Fuqarolarga tegishli 85 ta yengil avtomashina ashyoviy dalil tariqasida olingan. Ushbu mashinalarning barchasi belgilangan tartibda baholanib, o‘z egalariga qaytarilgan.