Senatorlar Toshkent viloyatida tadbirkorlik subyektlari va fuqarolarning yer uchastkalariga bo‘lgan huquqlarining kafolatlari ta’minlanishi, yerdan maqsadli foydalanish yuzasidan amalga oshirilgan ishlarda muayyan kamchiliklarga yo‘l qo‘yilganini aniqladi. Bu haqda Senat kengashining 25-maydagi yig‘ilishida parlament yuqori palatasi rahbari Tanzila Norboyeva ma’lum qildi, deb xabar beradi Senat matbuot xizmati.
Xususan, viloyatda yer uchastkalariga bo‘lgan huquqlar kafolatlarining ta’minlanishi o‘rganilganda 9614 ta holatda 1618 gektar yer maydoni o‘zboshimchalik bilan egallab olingani aniqlangan.
Shuningdek, viloyat hokimi qarori bilan tadbirkorlik subyektlariga yer ajratib berishda Qibray, Quyi Chirchiq, Ohangaron, Parkent, Yuqori Chirchiq va Bo‘stonliq tumanlarida Yer kodeksi talablari bajarilmagan, berilgan yer maydonlaridan tadbirkorlarning qanday foydalanayotgani yetarlicha nazoratga olinmagan.
Bundan tashqari, yer uchastkalari davlat va jamoat ehtiyojlari uchun olib qo‘yilishidan oldin yetkazilgan zararni qoplash choralari ko‘rilmagan va ayrim shaxslarga yetkazilgan zararlar bugungi kungacha ham to‘la qoplanmagan.
Senat kengashi majlisida jiddiy xato-kamchiliklarga yo‘l qo‘ygan mansabdor shaxslar masalasini ko‘rib chiqish va ularga tegishli choralar ko‘rish to‘g‘risida viloyat hokimligi hamda vazirlik va idoralar rahbarlariga ko‘rsatmalar berilgan.
Avvalroq Qibray tumani “Chinkeldi” mahallasida buldozer qulupnay ekilgan 8 gektar yer yo‘q qilingani xabar berilgan edi. Tuman hokimligi bu yer maydonlari “Yangi O‘zbekiston” bog‘i, “Istiqlol” majmuasi va boshqa obyektlarni qurish uchun davlat ehtiyojlari uchun olinganini ma’lum qilgandi.
Tuman hokimligi yangi bog‘ni barpo etish haqida ko‘rsatma bergach, dehqonlarga ogohlantirish xatlari yuborilganini, ular bilan kelishuvlar imzolanib, keltirilgan zararni qoplash bo‘yicha dalolatnomalar rasmiylashtirilganini bildirgandi. Keyinroq qulupnay dalasining buldozerda buzib tashlanishi oqibatida zarar ko‘rgan dehqonlarga tovon puli to‘lab berilgan.
Izoh (0)