O‘zbekiston Prezidenti Shavkat Mirziyoyev “Sog‘liqni saqlash sohasini kompleks rivojlantirishga doir qo‘shimcha chora-tadbirlar to‘g‘risida”gi qarorni imzoladi.
Qarorga ko‘ra, onalar va bolalar, reproduktiv yoshdagi ayollar salomatligini ta’minlash uchun zarur dori va tibbiyot vositalari (C vitamin, surfaktant va boshqalar) bilan qo‘shimcha ta’minlash uchun davlat budjetidan 2021-yilda 26 milliard so‘m ajratilishi, 2022-yildan boshlab esa ushbu xarajatlar uchun zarur mablag‘larni davlat budjeti parametrlarida ko‘zda tutish belgilandi.
Shuningdek, bolalar tibbiyot va tug‘ruq muassasalarida yuqori texnologik laborator uskunalaridan to‘laqonli va samarali foydalanish maqsadida 2022-yildan boshlab davlat budjetidan reaktiv, reagentlar, sarflov anjomlari hamda servis xizmatlar uchun qo‘shimcha 8 milliard so‘m ajratiladi.
Qaror bilan, shuningdek, 2021-yil 1-avgustdan boshlab Qoraqalpog‘iston Respublikasi, viloyatlar va Toshkent shahrida perinatal va skrining markazlari hamda birlamchi tibbiy-sanitariya muassasalaridagi onalar va bolalar salomatligiga mas’ul tuzilmalar (“Ayollar maslahatxonasi”, perinatal skrining xonasi, “tibbiyot brigadalari” tarkibidagi oilaviy shifokor, pediatr va boshqalar)ning homilador ayolni kompleks kuzatuvi bo‘yicha quyidagi chora-tadbirlarni nazarda tutuvchi o‘zaro hamkorlik va muvofiqlashtirilishini ta’minlovchi yagona tizim joriy etiladi:
- homilador ayolning kompleks kuzatuvi yagona ma’lumotlar bazasini yaratish;
- perinatal va skrining markazlari hamda birlamchi tibbiy-sanitariya muassasalaridagi onalar va bolalar salomatligiga mas’ul tuzilmalar tomonidan yagona ma’lumotlar bazasiga zarur ma’lumotlarni kiritish, shuningdek, homilador ayollarning tibbiy kartasini yuritish;
- shakllangan ma’lumotlarga asosan homilador ayollarga zarur maslahatlarni berish.
Eslatib o‘tamiz, Senatning Sud-huquq masalalari va korrupsiyaga qarshi kurashish qo‘mitasi raisi Narimon Umarov O‘zbekistonda o‘tgan yilga nisbatan go‘daklar va onalar o‘limi oshganini ma’lum qilgandi.
Qo‘mita raisining ma’lum qilishicha, O‘zbekistonda reproduktiv salomatlikni, onalik va bolalikni muhofaza qilishga oid qonun hujjatlari ijrosini ta’minlashdagi kamchiliklar oqibatida 2019-yilga nisbatan go‘daklar o‘limi 428 taga (2019-yilda 6432 ta, 2020-yilda esa 6860 ta), onalar o‘limi 10 taga (145—155) oshgan.
Shuningdek, Surxondaryoda 2020-yilda onalar va bolalar o‘limi soni oshgani ham qayd etilgan. Xususan, Surxondaryo viloyatida yashovchi qariyb 2,7 million nafar aholining 900 ming nafarga yaqini yoki 33,2 foizini voyaga yetmaganlar, 600 ming nafardan ortig‘ini tug‘ish yoshidagi ayollar tashkil etadi. 2020-yil davomida jami 35 ta (2019-yil 16 ta) onalar o‘limi qayd etilgan bo‘lib, 2019-yilning shu davriga nisbatan 19 taga ko‘paygan. Shuningdek, bolalar o‘limi darajasi 2020-yil davomida 586 tani tashkil qilgan bo‘lsa, bu ko‘rsatkich oldingi yillarga nisbatan kamaymagan.
Izoh (0)