Tijoriy transport vositalarini ishlab chiqarish bilan shug‘ullanuvchi Rossiyaning “GAZ guruhi” kompaniyasi hamda Toshkent viloyati hokimligi o‘rtasida hamkorlik memorandumi imzolandi. Tomonlar Toshkent viloyati hududida “GAZ” rusumli avtoulovlarni ishlab chiqarishni tashkil etish va viloyatdagi parklarni Rossiya texnikasi bilan yangilashni reja qilgan, deb yozadi “Podrobno”.
Hujjat 2021-yilning aprel oyida Toshkentda bo‘lib o‘tgan “Innoprom. O‘zbekistonda katta sanoat haftaligi” xalqaro sanoat ko‘rgazmasida erishilgan kelishuvlar yakunida imzolangan edi.
Hamkorlik doirasida Toshkent viloyati hududida yengil tijorat va o‘rta vaznli “GAZ” rusumli avtomashinalar, shuningdek, ularning bazalarida maxsus texnikalar ishlab chiqarishni tashkil etishni o‘rganish rejalashtirilgan. Shuningdek, tomonlar “GAZ guruhi” texnikalar bazasida viloyatdagi uy-joy kommunal xo‘jaligi, ijtimoiy va tibbiyot sohasi, shahar va shahar atrofida yo‘lovchilarni tashish, kichik va o‘rta biznesni o‘z ichiga olgan kompleks transport yechimini ishlab chiqish niyatida.
Bundan tashqari, memorandum shartlariga muvofiq, Toshkent viloyatining tez tibbiy yordam mashinalari, ijtimoiy va kommunal xizmatlarida keyinchalik amalga oshirish uchun transport parkini boshqarish uchun zamonaviy raqamli onlayn tizimlarni ishlab chiqish rejasi mavjud. Ushbu istiqbolli texnologiya viloyat avtoparklari ishi samaradorligini oshirishga yo‘naltirilgan.
Avvalroq O‘zbekiston va Rossiya samolyotsozlik sohasidagi qo‘shma loyihalarni muhokama qilayotgani, O‘zbekistonda gaz uzatish tizimini modernizatsiya qilish uchun 618 million dollargacha kredit jalb etilishi mumkinligi to‘g‘risida xabar berilgandi.
Izoh (0)