Surxondaryo viloyatining Boysun tumanida 14-aprel kuni bir necha shaxs O‘zbekiston Xalq demokratik partiyasi tuman kengashi deputati O‘ktam Jabborovni tayoq bilan kaltakladi, deb xabar qildi partiya matbuot xizmati.
Partiyaning ta’kidlashicha, holat bo‘yicha viloyat IIB jinoiy ish qo‘zg‘atgan, hozirda tergov olib borilmoqda.
“Surishtiruv ishlari boshlanganiga bir yarim oydan oshgan bo‘lsa-da, hamon muayyan bir xulosaga kelinmagani, tergov harakatlari cho‘zib yuborilgani jabrlanuvchi, uning yaqinlarining noroziligiga, partiyadoshlarining xavotiriga sabab bo‘lmoqda”, — deyiladi XDP xabarida.
Partiya Bosh prokuratura va Ichki ishlar vazirligini jinoyat ishini nazoratga olishga, aybdorlarga nisbatan qonuniy choralar ko‘rishga chaqirdi.
Bundan avval Navoiyda o‘quvchi qizning onasi farzandidan maktabga formada kelishini so‘ragan o‘qituvchini kaltaklagani, Toshkentda 92 yoshli ayol qizi va nevarasi tomonidan kaltaklangani hamda Qashqadaryoda o‘quvchiga tanbeh bergan homilador o‘qituvchi kaltaklangani haqida xabar berilgandi.
Izoh (0)