Avstraliyadagi onlayn-auksionda 1985-yilda ishlab chiqarilgan Holden Commodore PBE VK Group sotuvga qo‘yildi. Ayni vaqtda mahalliy avtopoygachi Piter Brokka tegishli sport sedani uchun 1 056 759 Avstraliya dollari (821 ming AQSh dollari) taklif etilmoqda, deb xabar beradi Motor.
Mazkur sportkarga birinchi bo‘lib avstraliyalik avtopoygachi, uch karra mamlakat chempioni Piter Brok egalik qilgan. Sportchi Holden markasining sport avtomobillarini yaratish jarayonida bevosita ishtirok etgan. Sotuvchining so‘zlariga ko‘ra, Commodore’dan juda kam foydalanilgan va u hech qachon restavratsiyaga uchramagan. Shu sababli 77,5 ming kilometr yo‘l bosgan sedan ajoyib holda saqlangan.
Ayni vaqtda noyob Holden Commodore sedanining narxi 1 056 759 Avstraliya dollariga yetgan. Auksion yakunlanishiga bir necha soat qolgan, shu sababli afsonaviy poygachining sportkari Avstraliya tarixidagi eng qimmat yo‘l avtomobiliga aylanishi mumkin. Amaldagi rekord 1971-yilda ishlab chiqarilgan Ford Falcon XY GT-HO Phase III sedaniga tegishli bo‘lib, 2021-yilning fevralida u 1,15 million Avstraliya dollariga sotilgan edi.
Avvalroq AQShda noyob poyga Ferrari’si 2 mln dollar qiymatida auksionga qo‘yilishi, yarim asr garajda saqlangan noyob Ferrari 2,5 mln dollarga sotilayotgani to‘g‘risida xabar berilgandi.
Izoh (0)