Австралиядаги онлайн-аукционда 1985 йилда ишлаб чиқарилган Holden Commodore PBE VK Group сотувга қўйилди. Айни вақтда маҳаллий автопойгачи Питер Брокка тегишли спорт седани учун 1 056 759 Австралия доллари (821 минг АҚШ доллари) таклиф этилмоқда, деб хабар беради Motor.
Сотувга қўйилган Holden Commodore PBE VK Group А конвейрдан 1985 йилда чиққан бўлиб, у ўз сериясида бешинчи автомобилга айланган. Ишлаб чиқариш тарихида австралиялик муҳандислар мазкур спорт седанидан 500 нусха яратган. Машинанинг фуқаролик версиясига 263 от кучига эга 4,9 литрли V8 двигатели ўрнатилган. Спорткарга агрегат билан бирга механик трансмиссия ўрнатилган. Орқа узатмали автомобиль соатига 100 километр тезликка 6 сонияда эришади. Максимал тезлиги — 220 километр/соат.
Мазкур спорткарга биринчи бўлиб австралиялик автопойгачи, уч карра мамлакат чемпиони Питер Брок эгалик қилган. Спортчи Holden маркасининг спорт автомобилларини яратиш жараёнида бевосита иштирок этган. Сотувчининг сўзларига кўра, Commodore’дан жуда кам фойдаланилган ва у ҳеч қачон реставрацияга учрамаган. Шу сабабли 77,5 минг километр йўл босган седан ажойиб ҳолда сақланган.
Айни вақтда ноёб Holden Commodore седанининг нархи 1 056 759 Австралия долларига етган. Аукцион якунланишига бир неча соат қолган, шу сабабли афсонавий пойгачининг спорткари Австралия тарихидаги энг қиммат йўл автомобилига айланиши мумкин. Амалдаги рекорд 1971 йилда ишлаб чиқарилган Ford Falcon XY GT-HO Phase III седанига тегишли бўлиб, 2021 йилнинг февралида у 1,15 миллион Австралия долларига сотилган эди.
Аввалроқ АҚШда ноёб пойга Ferrari’си 2 млн доллар қийматида аукционга қўйилиши, ярим аср гаражда сақланган ноёб Ferrari 2,5 млн долларга сотилаётгани тўғрисида хабар берилганди.
Изоҳ (0)