Avstraliyaning Graphene Manufacturing Group kompaniyasi Kvinslend universiteti biomuhandislik va nanotexnologiya instituti olimlari bilan hamkorlikda alyuminiy hamda grafen asosida innovatsion batareyani yaratdi. Ixtirochilarning so‘zlariga ko‘ra, yangi akkumulyatorlar deyarli barcha jihatlari bilan zamonaviy litiy-ionli batareyalarni ortda qoldiradi, deb xabar beradi Motor.
Alyuminiy-grafenli akkumulyatorlar noyob yerosti metallaridan foydalanishni talab etmaydi. Bu kabi batareyalar yonmaydi, katta miqdordagi tokka bardoshli, shuningdek, ishlash harorati diapazoni keng. Hozirda superkondensator bilan taqqoslanayotgan innovatsion quvvatlanish elementlarining tezligi litiy asosli zamonaviy akkumulyatorlarnikidan 60 barobarga yuqori. Bundan tashqari, ular uch barobar ko‘proq energiyani tutib tura oladi, shuningdek, arzon.
Alyuminiy va grafen asosidagi akkumulyatorlar elektr transportini rivojlantirishga hissa qo‘shishi mumkin. Avstraliya kompaniyasi innovatsion mahsulotni 2021-yil oxirida bozorga chiqarish niyatida. Biroq ishlab chiqarish avvaliga tijoriy maqsadlar uchun mo‘ljallangan kichik “tabletka”-batareyalardan boshlanadi. Elektr transport vositalari uchun batareyalarni ishlab chiqarish 2024-yilga rejalashtirilgan.
Eslatib o‘tamiz, 2019-yilda elektromobillarni tezkor zaryadlovchi suyuq akkumulyatorlar yaratilayotgani to‘g‘risida xabar berilgandi. Bunday akkumulyatorlar elektromobillarni bir necha daqiqa ichida zaryadlash imkonini berishi maqsad qilingan.
Izoh (0)