Norvegiya sudi Tesla’ni quvvatlantirish tezligini va dasturiy ta’minot yangilanganidan so‘ng elektrokarlarning uzoq masofaga yurishini qasddan sekinlashtirganlikda aybdor deb topdi. Avtomobil ishlab chiqaruvchi mazkur qarorga qarshi dalillarni keltirmasa, jabrlanuvchilarning har biriga 136 ming kronadan (16 ming AQSh dollar) kompensatsiya to‘lashi kerak bo‘ladi, deb yozadi Motor.
Mazkur muammo haqida 2019-yilda ma’lum bo‘lgan. O‘shanda 85 kilovatt/soat batareyalari o‘rnatilgan eski Tesla Model S va Model X egalari dasturiy ta’minot yangilangandan so‘ng, elektrokarlarning bir marta quvvatlanish orqali bosib o‘tadigan masofasi keskin kamayib ketganidan shikoyat qilgan. Electrek nashri 2014-yilgi Model S’ni misol qilib keltirgan — mashina yangilanishga qadar bir marta quvvatlanishda 397 kilometr yo‘l bosgan, yangi dasturiy ta’minot o‘rnatilgach esa bu 349 kilometrga (-11 foiz) tushib ketgan. Yangilanishdan keyingi ikkinchi muammo — Supercharger stansiyalarida ekspress-quvvatlantirish tezligining kamaygani.
Kompaniyadagilar buni “akkumulyatorni himoya qilish va uning xizmat ko‘rsatish muddatini uzaytirish” maqsadida deya tushuntirgan va bir marta quvvatlanish orqali bosib o‘tiladigan masofaning kamaytirilishi “u qadar ko‘p bo‘lmagan mashinalarga” kuzatilganini aytgan. Biroq ushbu bayonot elektrokar egalarini tinchlantirmagan va ular kompensatsiya so‘rab, sudga murojaat qilgan.
Da’volarning biri Norvegiyada berilgan. Kompaniya dasturiy ta’minot yangilanganidan so‘ng, tezlikni rostdan ham kamaytirgani bois mahalliy sud Tesla’ning zarariga qaror chiqargan.
Bugungi kunda Norvegiyada 10 mingga yaqin odam Tesla elektrokarlaridan foydalanadi. Kompensatsiyadan tashqari avtomobil ishlab chiqaruvchi katta miqdorda jarimaga ham tortilishi mumkin. Shu bilan birga, AQShning o‘zida ham Tesla ustida sud jarayonlari davom etmoqda.
Avvalroq Tesla Xitoydan 50 mingga yaqin avtomobilini chaqirib olishga majbur bo‘layotgani to‘g‘risida xabar berilgandi.
Izoh (0)