Тошкент шаҳрида 23 май куни соат тахминан 19:35 дан сўнг кучли ёғингарчилик (жала) кузатилди. Табиат ҳодиса шаҳарнинг турли ҳудудларида соат тахминан 21:30 га қадар давом этган. Жала вақтида момақалдироқ ва чақмоқлар мунтазам юз берди.
Бундай ёрқин табиат ҳодисаси ижтимоий тармоқларда, табиийки, алоҳида фаолликка сабаб бўлди. Telegram’даги оммабоп каналлар пойтахт кўчалари кучли ёғингарчилик сабаб яна сувга тўла бошлагани ҳақидаги видеохабарларга тўлди. Маълумотларга кўра, шаҳарнинг айрим ҳудудларида дўл ҳам ёққан.
Жала вақтидаги юз берган момақалдироқ ва чақмоқларнинг суратлари ва видеолари ҳам кўплаб эълон қилинди. Уларнинг бирида чақмоқ гўёки Тошкент телеминорасига урилганини кўриш мумкин. Шундан сўнг тармоқда телеминора учидаги Ўзбекистон давлат байроғи ёниб кетгани ҳақида хабарлар тарқалди.
Бироқ кейинроқ бу каби гап-сўзлар бошқа бир интернет-фойдаланувчи томонидан олинган биргина видеохабар билан рад этилди – байроқ жойида ва аввалгидек ҳилпираб турибди. Бошқа ракурсдан олинган яна бир видеолавҳада эса чақмоқ аслида телеминорага эмас, балки унинг ёнидаги ҳудудга урилгани акс этган.
Шунга қарамай, Фавқулодда вазиятлар вазирлиги матбуот хизмати телеминорага «ҳақиқатан ҳам чақмоқ урилгани»ни, бироқ бунинг оқибатида иншоотга шикаст етмаганини, телеминора одатдаги тартибда ишлаётганини маълум қилди. Тахминан 1,5—2 соат давом этган кучли ёғингарчилик пойтахт инфратузилмасига қанчалик зарар етказгани ҳақида ҳозирча аниқ маълумотлар йўқ.
Изоҳ (0)