Davlat xavfsizlik xizmati (DXX)ning Toshkentdagi Sayilgoh ko‘chasida joylashgan sobiq markaziy binosi hududi xususiy sektorga sotilishi haqida xabar berilgan edi. Uni sotib olish bo‘yicha 3 ta taklif kelib tushdi. Bu haqda 21-may kuni Davlat aktivlarini boshqarish agentligida bo‘lib o‘tgan Davlat tender komissiyasining navbatdagi yig‘ilishida ma’lum qilindi.
Ommaviy savdolarga chiqarilgan yirik aktivlarning 6 tasi bo‘yicha jami 16 ta taklif kelib tushgan. “Malika” savdo majmuasi, “Ichan qal’a” mehmonxonasi va “Qizil suv sport sog‘lomlashtirish” MChJ bo‘yicha 2 ta, “Poytaxt biznes majmuasi” MChJ mulkiy majmuasi bo‘yicha 3 ta, Gazetalar ishlab chiqarish majmuasi binosi bo‘yicha 4 ta talabgordan sotib olish bo‘yicha takliflar kelib tushgan.
Qayd etilishicha, endi ishchi organ tomonidan 5 ish kuni mobaynida talabgorlardan kelib tushgan takliflarning davlat aktivlari bo‘yicha savdo shartlariga mosligi, undan kelgusida foydalanish yo‘nalishlariga qo‘yilgan talabga taklif etilgan biznes konsepsiya loyihasining maqbul yoki maqbul emasligi o‘rganiladi.
Ishchi organ o‘z hisobotini tayyorlab, Davlat tender komissiyasiga ko‘rib chiqish uchun taqdim etadi va ikkinchi bosqichga o‘tgan yoki o‘tmagani to‘g‘risida ma’lumotlar e’lon qilinadi. Har bir talabgorga individual xabarlar yuboriladi.
Shu bilan birga Davlat tender komissiyasining birinchi bosqich yakunlari bo‘yicha qarori Davlat aktivlarini boshqarish agentligi agentligi tomonidan e’lon qilinadi.
Esatib o‘tamiz, Davlat aktivlarini boshqarish agentligi 30-mart kuni Toshkent shahri va viloyatida bir necha obyektlar sotuvga qo‘yilgani haqida ma’lum qilgandi. Ular orasida O‘zbekiston Birinchi Prezidenti Islom Karimovning to‘ng‘ich qizi Gulnora Karimovaga tegishli bo‘lgan “Sijjak” dam olish oromgohi ham bor.
Izoh (0)