Xitoyning bir nechta ilmiy muassasalari bilan hamkorlik qiladigan olimlar Veyfen Shi hamda Jorj Gao H5N8 parranda grippining tarkibi va tarixi yana bir pandemiyaning boshlanishiga olib kelishi mumkinligini taxmin qildi. Ular bu haqda Medical Xpress nashrida maqola e’lon qilgan.
Qayd etilishicha, gripp virusining yangi shtammi 2010-yilda Xitoyda o‘rdak organizmida aniqlangan. 2014-yilda shtammning tarqalishi Yaponiya hamda Janubiy Koreyada yovvoyi parrandalarda kuzatildi, 2016-yildan keyin esa Hindiston, Rossiya, Mongoliya, AQSh va Yevropaning ayrim mamlakatlarida uchradi.
“2020-yilda kasallikka chalinish holatlari dunyoning 46 ta mamlakatida qayd etildi. Shi va Gao ushbu tarix virusning juda tez tarqalishi mumkinligidan darak berayotganini ta’kidlagan. Shuningdek, Rossiya qishloq xo‘jaligi xodimlarida 2021-yilda mazkur virusning qayd etilgani vaziyatni yanada murakkablashtirmoqda.
Xitoylik olimlar bergan ma’lumotlar bo‘yicha kasallikka chalingan ishchilarda virusning alomatlari kuzatilmagan va uning bir odamdan boshqasiga qanday yuqqanini aniqlashning imkoni bo‘lmagan.
Biroq olimlar kasallik yuqqanidan keyin u joylashgan jonzot organizmiga tezda moslashib ketish xususiyatlariga ega ekanini qayd etgan.
Tadqiqotchilar ‘H5N8’ning yuqori patogenik xususiyatlarga ega ekani, ammo fermalar, bozorlar va yovvoyi qushlarni xushyor tarzda nazorat qilish virusning tarqalishini sekinlatishi mumkinligini aytib o‘tgan.
JSST avval odamlarga parranda grippining A(H5N1), A(H7N9) va A(H9N2) turlari, shuningdek, cho‘chqa grippining A(H1N1), A(H1N2) va (H3N2) shtammlari yuqqanini ma’lum qilgan.
Izoh (0)