Gollandiyaning Amsterdam shahrida noma’lum erkakning yo‘lovchilarga pichoq bilan hamla qilishi oqibatida kamida bir kishi halok bo‘ldi va to‘rt nafar odam turli darajadagi tan jarohatlari oldi. Bu haqda Dutch News xabar tarqatdi.
Mahalliy politsiyaning axborotiga ko‘ra, hujumlar shahardagi De-Peyp hududida amalga oshirilgan. Mazkur hududda jamoat transportining qatnovi vaqtincha to‘xtatilgan.
“Surishtiruvlar davomida barcha hujumlarning bir kishi tomonidan amalga oshirilgani aniqlandi”, – deyiladi politsiya bayonotida.
Amstelvenda yashagan 29 yoshli gumonlanuvchi huquq-tartibot idoralari tomonidan hibsga olingan. Politsiya hujumlar motivi terrorchilik tashkilotlari bilan aloqador deb hisoblash uchun asoslar yetarli emasligini bildirgan. Biroq politsiya tomonidan bu boradagi barcha taxminlar o‘rganib chiqilmoqda.
Avval Rossiya tarkibiga kiruvchi Tatariston poytaxti — Qozon shahridagi 175-sonli gimnaziyaga 11-may kuni uyushtirilgan hujumda, so‘nggi ma’lumotlarga ko‘ra, to‘qqiz kishi halok bo‘lgani xabar qilingan.
Shuningdek, Shanxayda ayol kishi pichoq bilan besh kishiga hujum qilgani va odamlarga jarohat yetkazgani haqida xabarlar tarqalgan. Keyinchalik ayolning bu kabi tajovuzkor harakatlarni amalga oshirishiga, uning yigiti bilan janjallashib qolgani va uni izlab topa olmagani sabab bo‘lgani oydinlashgandi.
Izoh (0)