Xabar berilganidek, “Toshkent 5 tashabbus harakati” yoshlar festivalining ikkinchi kuni doirasida xalq ta’limi vaziri Sherzod Shermatov yoshlar bilan ochiq muloqot qildi.
“Daryo” muxbirining xabar berishicha, vazir ta’lim tizimining vazifalariga to‘xtalar ekan, hozirgi dunyoqarash hozirgi dunyoga emas, balki kelajakdagi dunyoga qaratilishi lozimligini ta’kidladi. Ayni paytda dunyoda to‘rtinchi sanoat inqilobi ketayotgani, avval odam bilan odam raqobat qilgan bo‘lsa, endilikda texnologiyalar odam raqobat qiladigan darajaga kelib qolganini aytdi. Avvallari investitsiya arzon ishchi kuchi bo‘lgan joylarga kiritilgani, lekin hozir to‘liq avtomatlashtirilgan zavodlar ishga tushib, odamning, arzon ishchi kuchining ahamiyati qolmayotganini ta’kidladi. Mamlakatlarning ertangi raqobatbardoshligi qanchalik bolalarining ijodkorligi, ularning kompyuterdan farq qiladigan xususiyatlariga bog‘liqligini aytdi.
“Qaysi bola hozir 5 tashabbus, o‘sha madaniyat, san’at deymizmi, sport, kompyuter, kitob o‘qish, deymizmi, shularga qaraydigan bo‘lsa, ertaga raqobatbardosh kadr bo‘ladi. Maktablarimizda shuni targ‘ib qilishga harakat qilishimiz kerak. Maktablarda, to‘g‘ri, hali infratuzilmada muammo bordir, lekin maktablarda faollar zali bor, nega u yerda teatr yoki boshqa tomoshalarni qo‘ysak bo‘lmaydi? San’at, rasm chizishga qiziqtirsak bo‘lmaydi?!”, — deydi u.Bolalarimiz, afsuski, kitob o‘qishga uncha qiziqmay qo‘ydi. Mana hozir telefonlar rivojlanib ketganidan keyin bolalar ko‘proq sayoz bilimli bo‘lib qolishgandek. Oldinlari biz hammamiz yotib olib kitob o‘qirdik. Xafa bo‘lmanglar-u, hozirgi avlod yoshlari nima o‘qishini ham men, to‘g‘risi, tushunmayman. Masalan, men Facebook’da yozdim, bunday yosh bo‘yicha tahlil qilib qaraydigan bo‘lsam, asosan, 40 yoshdan yuqorilar bo‘lib chiqyapti. Keyingisi, Twitter’ni ham unday ko‘p bolalar o‘qiyotgani yo‘q. Umuman matni yo‘q Instagram, desak, uni ham ko‘rishmayapti hozir. Hozirgi yoshlar nimani o‘qiyapti, ularga qanday yetkazsak bo‘ladi, degan masalada ham sizlarning fikringiz kerak.Shermatov, shuningdek, tadbirga yoshlar barobarida kelgan jurnalistlardan birining festivalda kitobxonlik targ‘iboti sust ekani borasidagi savolga javob berar ekan, o‘zi bilan birga olib kelgan paketlardagi kitoblarni yig‘ilganlarga ko‘rsatdi.Sherzod Shermatov, xalq ta’limi vaziri
“Men, yaxshi savol berganlarga noutbukdan tashqari atay kitoblar olib kelgan edim. Hali ularni gapirishga ulgurmadim. Men o‘zim ham tavsiya qilmoqchi bo‘lgan kitoblar bor bularning orasida. Mana, masalan, o‘zbek tiliga yaxshi kitoblarni tarjima qilishni boshlashibdi, rahmat. Napoleon Хill eng sara asarlari. O‘zining asl tilida o‘qiganman, yaxshi kitob. Ertaga muvaffaqiyatga erishish, boy bo‘lishga qaratilgan yaxshi kitob”, — deydi vazir.
Mavzuga doir:
Izoh (0)