Шерзод Шерматов: «Ҳозирги авлод ёшлари нима ўқишини ҳам мен, тўғриси, тушунмайман»

Хабар берилганидек, «Тошкент 5 ташаббус ҳаракати» ёшлар фестивалининг иккинчи куни доирасида халқ таълими вазири Шерзод Шерматов ёшлар билан очиқ мулоқот қилди.

«Дарё» мухбирининг хабар беришича, вазир таълим тизимининг вазифаларига тўхталар экан, ҳозирги дунёқараш ҳозирги дунёга эмас, балки келажакдаги дунёга қаратилиши лозимлигини таъкидлади. Айни пайтда дунёда тўртинчи саноат инқилоби кетаётгани, аввал одам билан одам рақобат қилган бўлса, эндиликда технологиялар одам рақобат қиладиган даражага келиб қолганини айтди. Авваллари инвестиция арзон ишчи кучи бўлган жойларга киритилгани, лекин ҳозир тўлиқ автоматлаштирилган заводлар ишга тушиб, одамнинг, арзон ишчи кучининг аҳамияти қолмаётганини таъкидлади. Мамлакатларнинг эртанги рақобатбардошлиги қанчалик болаларининг ижодкорлиги, уларнинг компьютердан фарқ қиладиган хусусиятларига боғлиқлигини айтди.

«Қайси бола ҳозир 5 ташаббус, ўша маданият, санъат деймизми, спорт, компьютер, китоб ўқиш, деймизми, шуларга қарайдиган бўлса, эртага рақобатбардош кадр бўлади. Мактабларимизда шуни тарғиб қилишга ҳаракат қилишимиз керак. Мактабларда, тўғри, ҳали инфратузилмада муаммо бордир, лекин мактабларда фаоллар зали бор, нега у ерда театр ёки бошқа томошаларни қўйсак бўлмайди? Санъат, расм чизишга қизиқтирсак бўлмайди?!», — дейди у.

Болаларимиз, афсуски, китоб ўқишга унча қизиқмай қўйди. Мана ҳозир телефонлар ривожланиб кетганидан кейин болалар кўпроқ саёз билимли бўлиб қолишгандек. Олдинлари биз ҳаммамиз ётиб олиб китоб ўқирдик. Хафа бўлманглар-у, ҳозирги авлод ёшлари нима ўқишини ҳам мен, тўғриси, тушунмайман. Масалан, мен Facebook’да ёздим, бундай ёш бўйича таҳлил қилиб қарайдиган бўлсам, асосан, 40 ёшдан юқорилар бўлиб чиқяпти. Кейингиси, Twitter’ни ҳам ундай кўп болалар ўқиётгани йўқ. Умуман матни йўқ Instagram, десак, уни ҳам кўришмаяпти ҳозир. Ҳозирги ёшлар нимани ўқияпти, уларга қандай етказсак бўлади, деган масалада ҳам сизларнинг фикрингиз керак.

Шерзод Шерматов, халқ таълими вазири

Шерматов, шунингдек, тадбирга ёшлар баробарида келган журналистлардан бирининг фестивалда китобхонлик тарғиботи суст экани борасидаги саволга жавоб берар экан, ўзи билан бирга олиб келган пакетлардаги китобларни йиғилганларга кўрсатди.

«Мен, яхши савол берганларга ноутбукдан ташқари атай китоблар олиб келган эдим. Ҳали уларни гапиришга улгурмадим. Мен ўзим ҳам тавсия қилмоқчи бўлган китоблар бор буларнинг орасида. Мана, масалан, ўзбек тилига яхши китобларни таржима қилишни бошлашибди, раҳмат. Наполеон Хилл энг сара асарлари. Ўзининг асл тилида ўқиганман, яхши китоб. Эртага муваффақиятга эришиш, бой бўлишга қаратилган яхши китоб», — дейди вазир.