O‘zbekistonning Belgiyadagi elchixonasi Yevropa mamlakatlariga chiqishni rejalashtirayotgan o‘zbekistonliklarni turli firibgarliklar tuzog‘iga tushib qolishdan ogohlantiradi, deb xabar bermoqda “Dunyo” agentligi.
O‘zbekistonning xalqaro havo qatnovlari faollashib borayotgani va karantin choralari yengillashayotgani bois Yevropa mamlakatlariga, jumladan, Belgiya va Niderlandiyaga ishlash va o‘qish maqsadida borayotgan O‘zbekiston fuqarolarining soni ortayotgani kuzatilmoqda.
Fuqarolarning aksariyati Boltiqbo‘yi mamlakatlari, Polsha, Ruminiya va Ukraina davlatlari hududidan Belgiya va Niderlandiyaga chiqish uchun tranzit zonasi sifatida foydalanishga intilmoqda.
Bu holat G‘arbiy Yevropa mamlakatlariga noqonuniy tarzda ishchi kuchini jo‘natish bilan shug‘ullanayotgan jismoniy va yuridik shaxslar faoliyati bilan bog‘liq. Buning oqibatida Belgiya va Niderlandiyada vizasiz yoki ishlash, yashashga tegishli ruxsatnomasiz qurilish, xizmat ko‘rsatish, qishloq xo‘jaligi va boshqa sohalarda noqonuniy mehnat qilayotgan fuqarolarning safi kengayib bormoqda.
O‘rganishlar shuni ko‘rsatmoqdaki, O‘zbekiston fuqarolari aksariyat hollarda mahalliy tilda so‘zlasha olmasligi, huquqiy bilimsizligi, ishonuvchanligi va boshqa sabablar bilan turli firibgarlarning tuzog‘iga ilinib qolmoqda.
Ayrim fuqarolar bilib-bilmay ana shunday firibgarlarning aldoviga uchishi oqibatida pulidan ayrilib, begona yurtlarda qiyin ahvolga tushib qolmoqda. Yana achinarli tomoni shundaki, o‘zbekistonliklarning o‘zga davlat qonunchiligini buzgani uchun ma’muriy va jinoiy javobgarlikka tortilish hollari ham sodir bo‘lmoqda.
Shu munosabat bilan, O‘zbekistonning Belgiyadagi elchixonasi Yevropa davlatlariga borishni rejalashtirayotgan mamlakat fuqarolariga murojaat qildi.
“Yuqorida qayd etilgan mamlakatlarda xorijiy va O‘zbekiston fuqarolari tomonidan tashkil etilgan, o‘z faoliyatini ijtimoiy tarmoqlar orqali vatandoshlarning guruhlarida reklama qilayotgan, xorijga ishga yoki o‘qishga jo‘natish vakolatiga ega bo‘lmagan turli uyushgan guruhlarga ishonib qolmang!
Yevropa mamlakatlariga ishga, o‘qishga borish uchun qisqa muddatlarda rasmiy xorijiy viza va zarur hujjatlarni tayyorlab berish xizmatlarini taklif qilishganda Tashqi mehnat migratsiyasi agentligi (71 202 3355, 71 200 0061 yoki 1282) va O‘zbekistonning xorijdagi elchixonalari bilan maslahatlashing!
Xorijga vaqtincha yoki doimiy yashash, ishlash va o‘qishga kelganingizda elchixonada konsullik ro‘yxatiga turishni unutmang!
O‘zini o‘zbekistonliklarning vakili, himoyachisi sifatida ko‘rsatishga urinayotgan, turli ijtimoiy tarmoqlarda noto‘g‘ri xabarlar, asossiz ma’lumotlar tarqatayotgan kimsalarning fitnalaridan ehtiyot bo‘ling!
2020-yil pandemiya davrida elchixona konsullik okrugida qolib ketgan vatandoshlarimizga konsullik-huquqiy va moddiy yordam ko‘rsatildi, ularning vizalari uzaytirib berildi, O‘zbekistonga qaytishi uchun to‘rt marta charter reysi tashkil qilindi va mamlakatga ko‘p marotaba insonparvarlik yordami yuborildi.
Bugun diplomatiya vakolatxonasi xorijda qiyin ahvolga tushib qolgan O‘zbekiston fuqarolariga respublika hukumati tomonidan ajratilgan mablag‘lar hisobidan moddiy-ijtimoiy yordam ko‘rsatmoqda.
Yevropa mamlakatlarida huquqiy savodxonlik va madaniyatning yuqoriligi, qonunlar va davlat idoralarining samarali faoliyat ko‘rsatishini inobatga olib, chet elda bo‘lib turganingizda turli firibgar shaxslarning aldoviga tushib qolgan, ularning noqonuniy harakatidan jabr ko‘rgan bo‘lsangiz, xorijiy mamlakatlar huquqni muhofaza qilish idoralariga yoki elchixonaning +32 2 661 2042 telefon raqami, consulat@uzbekistan.be elektron pochtasi yoki https://t.me/CONSULMFAUZ Telegram tarmog‘iga bevosita murojaat qiling!”, – deb ta’kidlangan elchixona murojaatida.
O‘zbekiston IIV jinoyatlarga qarshi kurashish bo‘limi nomidan foydalanib, fuqarolardan 240 ming so‘m undirilayotganidan ogohlantirgani hamda SSV aholini soxta tabiblardan ogohlantirgani haqida xabar berilgandi.
Izoh (0)