So‘nggi bir necha kun ichida Marokashdan 8 mingga yaqin kishi Afrika shimolidagi Ispaniyaning Seuta muxtor shahriga suzib yoki piyoda ko‘chib o‘tdi. Muhojirlarning kamida 1500 nafari voyaga yetmaganlar. Ularning aksariyati marokashliklar, ammo ular orasida Sahroi Kabirdan janubdagi Afrika mamlakatlaridan chiqqan qochqinlar ham bor. Seuta anklavi 17-asrdan beri Ispaniya nazorati ostida. “RBK” muhojirlar Ispaniyaga qanday o‘tayotgani va hukumatning inqirozni yengishga oid choralari haqida fotoreportaj tayyorladi.
Seutadagi voqealar Ispaniya va Marokash o‘rtasidagi munosabatlarning 2002 yildan — Marokash sohillari yaqinidagi kimsasiz orol uchun hududiy mojaro kelib chiqqanidan buyon sodir bo‘lgan eng katta inqirozlardan biridir.
Inqirozga Marokash tomonidan chegara nazoratining zaiflashishi sabab bo‘lgan bo‘lishi mumkin. AP agentligining xabar berishicha, Marokash hukumati G‘arbiy Sahroi Kabir Ozodlik fronti bosh kotibiga Ispaniyaga kirish uchun berilgan ruxsatga shu tarzda javob ko‘rsatgan bo‘lishi mumkin. Hozirgi vaqtda ushbu hududlar atrofida keskinlik kuchaygan, mahalliy aholi Marokash hukumatidan norozi.
El Pais xabar berishicha, Ispaniya Ichki ishlar vazirligi Marokash hukumati bilan Seuta hududiga kirib kelgan noqonuniy muhojirlarni tezda deportatsiya qilish to‘g‘risida kelishuvga erishdi. Ushbu kelishuv Marokashdan kirib kelgan noqonuniy muhojirlarni chiqarib yuborishni nazarda tutadi.
El Pais’ning ta’kidlashicha, Marokash chegarachilari o‘z navbatida Seutaga o‘tish punktini har ikki soatda ochib, rasmiy ravishda atigi 40-50 kishining o‘tishiga imkon beradi.
Izoh (0)