Голландиянинг Амстердам шаҳрида номаълум эркакнинг йўловчиларга пичоқ билан ҳамла қилиши оқибатида камида бир киши ҳалок бўлди ва тўрт нафар одам турли даражадаги тан жароҳатлари олди. Бу ҳақда Dutch News хабар тарқатди.
Маҳаллий полициянинг ахборотига кўра, ҳужумлар шаҳардаги Де-Пейп ҳудудида амалга оширилган. Мазкур ҳудудда жамоат транспортининг қатнови вақтинча тўхтатилган.
«Суриштирувлар давомида барча ҳужумларнинг бир киши томонидан амалга оширилгани аниқланди», – дейилади полиция баёнотида.
Амстелвенда яшаган 29 ёшли гумонланувчи ҳуқуқ-тартибот идоралари томонидан ҳибсга олинган. Полиция ҳужумлар мотиви террорчилик ташкилотлари билан алоқадор деб ҳисоблаш учун асослар етарли эмаслигини билдирган. Бироқ полиция томонидан бу борадаги барча тахминлар ўрганиб чиқилмоқда.
Аввал Россия таркибига кирувчи Татаристон пойтахти — Қозон шаҳридаги 175-сонли гимназияга 11 май куни уюштирилган ҳужумда, сўнгги маълумотларга кўра, тўққиз киши ҳалок бўлгани хабар қилинган.
Шунингдек, Шанхайда аёл киши пичоқ билан беш кишига ҳужум қилгани ва одамларга жароҳат етказгани ҳақида хабарлар тарқалган. Кейинчалик аёлнинг бу каби тажовузкор ҳаракатларни амалга оширишига, унинг йигити билан жанжаллашиб қолгани ва уни излаб топа олмагани сабаб бўлгани ойдинлашганди.
Изоҳ (0)