Hindistonda koronavirus tarqalishining ikkilamchi ta’siri sifatida paydo bo‘lgan qora zamburug‘ epidemiyasi fonida yana bir zamburug‘ kasalligi aniqlandi, u mamlakatda oq zamburug‘ deb ataladi. Bu haqda Times of India xabar berdi.
COVID-19’ning halokatli epidemiyasini boshdan kechirayotgan sharqiy Bixar shtatida to‘rt kishida yangi zamburug‘ kasalligi qayd etildi. Shifokorlardan biri vafot etdi.
Tibbiy mutaxassislarning fikriga ko‘ra, oq zamburug‘ o‘pka, oshqozon, buyrak, jinsiy a’zolar, shuningdek, tirnoq va teriga o‘tkir va tez ta’sir etishi sababli qorasidan xavfliroq.
Shifokorlar ogohlantirishicha, asosan, burun bo‘shliqlari va o‘pkani zararlaydigan qora zamburug‘dan farqli o‘laroq, yangi infeksiya butun tananing hayotiy faoliyatiga ta’sir qilishi mumkin. Bundan tashqari, oq zamburug‘ bilan kasallanish homilador ayollar va bolalar uchun xavfli bo‘lishi mumkin.
Har ikkala zamburug‘ kasalligini yuqtirish xavfi immuniteti zaif kishilarda, shuningdek, tibbiy kasalliklarga, jumladan, qandli diabetga chalingan, reanimatsiyada bo‘lgan va uzoq vaqt steroid qabul qilgan bemorlarda yuqori bo‘ladi.
Avvalroq Hindistonning Rajastan va Telangana shtatlarida qora zamburug‘ epidemiyasi e’lon qilingan edi. Xususan, Rajastan shtatida ushbu infeksiya bilan kasallangan 100 ga yaqin bemor borligi aytilgan.
Hindistonda COVID-pandemiya fonida odamlarning xavfli zamburug‘larga chalinish holatlari ko‘paydi. Rossiyalik virusologlar mukormikoz kasalligi global xavf keltirib chiqarmasligini aytdi. Shu bilan birga qora zamburug‘ infeksiyasi Rossiyada ham qayd etildi.
Ma’lumot uchun, qora zamburug‘ — mukormikoz tabiatda keng tarqalgan mikroskopik zamburug‘lar (mukormitsetlar) keltirib chiqaradigan noyob infeksiya.
Izoh (0)