Samarqand viloyati Kattaqo‘rg‘on tumanida o‘zaro kelishmovchilik oqibatida opasini pichoqlab qo‘ygan singilga sud hukmi o‘qildi. Bu haqda Oliy sud matbuot xizmati xabar berdi.
Ma’lum qilinishicha, 2021-yil 19-yanvar kuni soat 18:30 larda o‘zaro tortishib qolgan opa-singil bir-birini fohishalikda, yengiltabiatlikda ayblagan. Bu vaqtda ayollarning ikkisi ham spirtli ichimlik ta’sirida — mast bo‘lgan.
Janjal oqibatida singil opasini pichoqlab, o‘ldirgan.
“Opam har doim ichgani, onamni haqorat qilgani uchun o‘rtamizda mojaro yuz berdi. Jahl ustida pichoq urdim, aybimga iqrorman, qilgan ishimdan pushaymonman”, — deydi ayblanuvchi.
Sudlanuvchiga Jinoyat kodeksining 97-modda (qasddan odam o‘ldirish) 2-qismi “b” bandi bilan 57-moddasini qo‘llab, 10 yil muddatga ozodlikdan mahrum etish jazosi tayinlandi.
Avvalroq Olmazorda voyaga yetmagan bola tengdoshini pichoqlab qo‘ygani, Farg‘onada qaynata va qaynakasini pichoqlagan shaxs oila buzilmasligi uchun sud zalidan ozod qilingani, Navoiyda xotiniga pichoq o‘qtalib, uni qo‘rqitib qo‘ymoqchi bo‘lgan fuqaroga nisbatan jinoyat ishi qo‘zg‘atilgani to‘g‘risida xabar berilgandi.
Izoh (0)