Qibray tumanida 9 gektar qulupnay maydoni buzilib, vayron qilingani haqida videolavha ijtimoiy tarmoqlarda tarqalib, keng muhokamalarga sabab bo‘lgandi. Qibray tumani hokimligi fermer xo‘jaligiga yetkazilgan zarar belgilangan tartibda qoplab berilishini ma’lum qildi.
Hokimlik xabariga ko‘ra, ushbu videolavhada ko‘rsatilgan yer maydoni “Chinkeldi” MFY Yangiobod qishlog‘i M.Behbudiy ko‘chasida joylashgan “Saidvali hoji” fermer xo‘jaligiga tegishli bo‘lib, jami 20,9 gektarlik maydonning 8 gektariga (videoda 9 gektar deyilgan) qulupnay ekilgan.
“Saidvali hoji” fermer xo‘jaligi yer maydonlaridan ekin ekib foydalanish uchun dehqonlar bilan o‘zaro og‘zaki (hech qanday hujjatlar rasmiylashtirilmagan) kelishuvga asosan ikkilamchi ijaraga berilgan.
“Fermer xo‘jaligining yer maydonlari davlat ehtiyojlari uchun olinganligi (oldindan ogohlantirish xatlari berilgan) munosabati bilan fermer xo‘jaligiga yetkazilgan zarar belgilangan tartibda qoplab beriladi. Ushbu mablag‘lar fermer xo‘jaligi hisob raqamiga o‘tkazilgandan so‘ng fermer xo‘jaligi bilan ikkilamchi ijarada foydalanib kelgan dehqonlarga keltirilgan zararni qoplash ‘Saidvali hoji’ fermer xo‘jaligi tomonidan amalga oshirilishi bo‘yicha dalolatnoma rasmiylashtirilgan”, — deyiladi hokimlik xabarida.
Shuningdek, keltirilgan zararni qoplash bo‘yicha amalga oshirilgan ishlar yuzasidan qo‘shimcha axborot berilishi ma’lum qilingan.
Eslatib o‘tamiz, qulupnay dalasi buldozerda buzib tashlanayotgani aks etgan video ijtimoiy tarmoqlarda 20-may kuni tarqalgandi. Unda dehqonlarning bunga qarshilik qilayotgani, voqea joyida ichki ishlar organlari ham borligini ko‘rish mumkin. Holat yuzasidan Toshkent viloyati IIB matbuot kotibi Bobur To‘laganov izoh berib, dalaning buzilishiga ichki ishlar xodimlari aloqador emasligini bildirgandi.
Izoh (0)