Tuman hokimligi matbuot xizmati axborotiga ko‘ra, umumiy maydoni 20,9 gektar bo‘lgan yer uchastkasi “Chinkeldi” mahallasidagi “Saidvali hoji” fermer xo‘jaligiga tegishli bo‘lib, uning 8 gektariga qulupnay ekilgan (ijtimoiy tarmoqlarda tarqalgan videolarda 9 gektar deyilgan). Dehqonlarga og‘zaki kelishuv asosida va hujjat rasmiylashtirmasdan sub-ijaraga berilgan yerlar davlat ehtiyojlari uchun olib qo‘yilgan.
“Gazeta.uz” nashri Qibray tumani hokimligiga tayanib xabar berishicha, bu yerlar “Yangi O‘zbekiston” bog‘i, “Istiqlol” majmuasi va boshqa obyektlarni qurish uchun ajratilgan hududning bir qismidir. Yangi bog‘ni barpo etish haqida ko‘rsatma berilgach, dehqonlarga ogohlantirish xatlari yuborilgan. Hokimlik axborotida ta’kidlanishicha, ular bilan kelishuvlar imzolangan va dalolatnomalar rasmiylashtirilgan.
Ayni paytda mutaxassislar yetkazilgan zararni baholamoqda. Shuningdek, dala egalariga yig‘ilmagan qulupnay hosili uchun bozor narxida tovon puli to‘lanishi kutilmoqda. Hokimlikning ta’kidlashicha, hosil unchalik katta bo‘lmagan, chunki qulupnayning dastlabki hosillari allaqachon yig‘ib olingan edi.
Eslatib o‘tamiz, 1-may kuni prezident Shavkat Mirziyoyev Toshkent viloyatining Qibray tumanidagi yangi bog‘ barpo etiladigan joyda bo‘lib, dastlabki daraxtlarni ekish jarayonida qatnashgan edi. Davlat rahbari yangi bog‘da daraxtlarni ulkan daraxtning besh novdasi shaklida ekishni taklif qilgan edi — bu O‘zbekistonni rivojlantirish bo‘yicha Harakatlar strategiyasining beshta ustuvor yo‘nalishini ramziy ma’noda anglatadi. Bu yerda O‘zbekiston mustaqilligining 30 yilligiga bag‘ishlangan “Istiqlol” majmuasi ham bunyod etiladi.
Izoh (0)