Farg‘onada qaynata va qaynakasini pichoqlagan shaxs oila buzilmasligi uchun sud zalidan ozod qilindi
Farg‘ona viloyati Beshariq tumanida qaynata va qaynakasini pichoqlab qo‘ygan shaxsga sud hukmi o‘qildi. Bu haqda “Zamon” informatsion dasturida xabar qilindi.
Qayd etilishicha, 2020-yil 20-avgust kuni soat 13:00 larda O‘.N. yashash hovlisida turmush o‘tog‘i O‘.H. bilan janjallashadi. Shu kuni 14:00 larda O‘.N.ning qaynatasi M.A va qaynakasi G‘.A. janjal sabablarini bilish uchun uning xonadoniga keladi.
“Qaynatam keldi, to‘g‘ri yashaysanmi, deganda men, avval qizingizga tarbiya bering, dedim. Shunda qaynakam aralashib, oldin senga tarbiya berish kerak, degan vaqtda janjallashib ketdik. Qaynatam orqamdan ushlab berdi. Yotgan joyimda ko‘krak qismimga ikki marta tepgandan so‘ng chidolmadim. Emaklab borib, tokchadagi pichoq bilan ularni jarohatladim”, – deydi ayblanuvchi.
O‘tkazilgan sud-tibbiy ekspertizasining xulosasiga ko‘ra, pichoq G‘.A.ning qovuq soha va chap tomonida qorin bo‘shlig‘iga teshib o‘tgan, ichki a’zolarini shikastlamagan, chap son yuqori qismi va shu soha mushaklarini shikastlagan. Qaynatasining faqat chap tizza sohasiga tan jarohati yetkazgan.
“Men uni do‘pposlamaganman, unga birinchi bo‘lib musht ko‘targanim yo‘q. Dadamni so‘kib, dag‘dag‘a qilib tashlangan edi, keyin iloji bo‘lmadi”, – deydi ayblanuvchining qaynakasi.
O‘.N. Jinoyat kodeksining 104-moddasi 3-qismi “a” bandi (ikki yoki undan ortiq shaxs badaniga qasddan og‘ir shikast yetkazish) va 105-moddasi 2-qismi “a” bandi (ikki yoki undan ortiq shaxs badaniga qasddan o‘rtacha og‘ir shikast yetkazish) bilan aybli deb topilib, sudda uning ishi ko‘rib chiqildi.
Aybdor qilmishidan afsusda ekani, o‘sha kuni jahlda ko‘ziga hech nima ko‘rinmaganini aytdi. Uning 2 nafar farzandi borligi, oila buzilmasligini inobatga olib, qaynatasi va qaynakasi sud zalida uni kechirgani ta’kidlandi.
Shularni hisobga olib, sudya unga nisbatan uzil-kesil 3 yil 2 oy muddatga ozodlikdan cheklash jazosi tayinladi, hamda qamoqda o‘tirgan 7 oy 14 kun chegirilib, 2 yil 7 oy 16 kunga ozodlikdan cheklash jazosi qoldirildi va sud zalidan ozod qilindi.
Bundan avval Jizzaxda er Telegram’dagi yozishmalari sabab xotinini bo‘ynidan pichoqlab o‘ldirgani, Navoiyda Malibu mingan fuqaro yo‘lda ketayotgan Nexia’dagi ikki kishiga o‘qrayib qaragani uchun pichoqlangani hamda Chiroqchida fuqaro qo‘shnisi bilan bilyardxonada tortishib qolib, uni pichoqlab o‘ldirilgani haqida xabar berilgandi.
