Iqtisodiy taraqqiyot va kambag‘allikni qisqartirish vazirligi huzuridagi Prognozlashtirish va makroiqtisodiy tadqiqotlar instituti direktori lavozimiga Umid Obidxo‘jayev tayinlandi, deb xabar berdi institut matbuot xizmati.
Umid Obidxo‘jayev 1987-yilda Namanganda tug‘ilgan. 2009-yilda Vazirlar Mahkamasi huzuridagi Toshkent Islom universitetini, 2014-yilda Yaponiyaning Keyo universitetining magistratura bosqichini hamda 2017-yilda Yaponiyaning Keyo universitetining doktorantura bosqichini iqtisodiyot yo‘nalishi bo‘yicha tamomlagan.
Mehnat faoliyatini 2009-yilda Davlat mulki qo‘mitasining Tashqi aloqalar va jamoatchilik bilan aloqalar boshqarmasi yetakchi mutaxassisi lavozimida boshlagan.
Yaponiyada Osiyo taraqqiyot banki instituti, Osiyo taraqqiyot bankining Osiyo va Tinch okeani mintaqasidagi infratuzilma investitsiyalarini baholash instituti, Yaponiyadagi Keyo universiteti, Iqtisodiyot va sanoat vazirligida faoliyat yuritgan.
Tayinlovga qadar u 2019-yilning oktabridan buyon Prezident Administratsiyasi huzuridagi Iqtisodiy tadqiqotlar va islohotlar markazi (CERR) direktori o‘rinbosari lavozimida ishlab kelayotgandi.
Markazning avvalgi direktori qaysi lavozimga tayinlanganiga xabarda aniqlik kiritilmagan.
Avvalroq O‘zbekiston avtomobil yo‘llari qo‘mitasi raisiga o‘rinbosarlar tayinlangani, Miralisher Islomov Gematologiya markaziga direktor etib tayinlangani haqida xabar berilgan edi.
Izoh (0)