Иқтисодий тараққиёт ва камбағалликни қисқартириш вазирлиги ҳузуридаги Прогнозлаштириш ва макроиқтисодий тадқиқотлар институти директори лавозимига Умид Обидхўжаев тайинланди, деб хабар берди институт матбуот хизмати.
Умид Обидхўжаев 1987 йилда Наманганда туғилган. 2009 йилда Вазирлар Маҳкамаси ҳузуридаги Тошкент Ислом университетини, 2014 йилда Япониянинг Кеё университетининг магистратура босқичини ҳамда 2017 йилда Япониянинг Кеё университетининг докторантура босқичини иқтисодиёт йўналиши бўйича тамомлаган.
Меҳнат фаолиятини 2009 йилда Давлат мулки қўмитасининг Ташқи алоқалар ва жамоатчилик билан алоқалар бошқармаси етакчи мутахассиси лавозимида бошлаган.
Японияда Осиё тараққиёт банки институти, Осиё тараққиёт банкининг Осиё ва Тинч океани минтақасидаги инфратузилма инвестицияларини баҳолаш институти, Япониядаги Кеё университети, Иқтисодиёт ва саноат вазирлигида фаолият юритган.
Тайинловга қадар у 2019 йилнинг октябридан буён Президент Администрацияси ҳузуридаги Иқтисодий тадқиқотлар ва ислоҳотлар маркази (CЕRR) директори ўринбосари лавозимида ишлаб келаётганди.
Марказнинг аввалги директори қайси лавозимга тайинланганига хабарда аниқлик киритилмаган.
Аввалроқ Ўзбекистон автомобиль йўллари қўмитаси раисига ўринбосарлар тайинлангани, Миралишер Исломов Гематология марказига директор этиб тайинлангани ҳақида хабар берилган эди.
Изоҳ (0)