Monopoliyaga qarshi kurashish qo‘mitasi huzuridagi Iste’molchilar huquqlarini himoya qilish agentligi “Iste’molchilarning huquqlarini himoya qilish to‘g‘risida”gi qonunga o‘zgartirish kiritish to‘g‘risidagi qonun loyihasini ishlab chiqdi. O‘zgartirish yaroqlilik muddati o‘tgan, ishlab chiqarilgan sanasi va yaroqlilik muddati ko‘rsatilmagan, normativ talablarga javob bermaydigan, shuningdek, qalbaki tovarlar savdosiga qarshi moliyaviy sanksiyalar qo‘llashni nazarda tutadi. Hujjat Oliy Majlis Qonunchilik palatasida ikkinchi o‘qishda ko‘rib chiqilmoqda.
Agentlikning aniqlik kiritishicha, amaldagi qonunchilikka binoan qoidabuzarlarga nisbatan qo‘llaniladigan ma’muriy jarimalardan qat’i nazar, BHMning 50 baravari (12,25 million so‘m) miqdoridagi moliyaviy sanksiya qo‘llaniladi.
“Iste’molchilarning huquqlarini himoya qilish to‘g‘risida”gi qonunning 11-moddasiga ko‘ra, sotuvchilarga ishlab chiqarilgan sanasi va yaroqlilik muddati ko‘rsatilmagan yoki yaroqlilik muddati o‘tgan tovarlarni qabul qilish hamda realizatsiya qilish man etilishi belgilangan. Ma’muriy javobgarlik to‘g‘risidagi kodeksning 178-moddasida iste’molchilarga bila turib noto‘g‘ri ma’lumotlar taqdim etganlik, shu jumladan, iste’molchilarni tovarning iste’molga oid xususiyatlari yoki sifati xususida chalg‘itish tufayli iste’molchilarga zarar yetkazish — huquqbuzarlik ashyolarini musodara qilib, fuqarolarga BHMning 3 baravaridan 7 baravarigacha, mansabdor shaxslarga esa 7 baravaridan 10 baravarigacha miqdorda jarima solishga sabab bo‘lishi belgilangan.
Yaroqlilik muddati o‘tgan tovarlarni, shuningdek, ishlab chiqarilgan sanasi va yaroqlilik muddati ko‘rsatilishi shartligi qonun hujjatlarida nazarda tutilgan tovarlarni ishlab chiqarilgan sanasi va yaroqlilik muddati ko‘rsatilmagan holda realizatsiya qilish hamda sotish uchun qabul qilganlik — huquqbuzarlik ashyolarini musodara qilib, fuqarolarga BHMning 3 baravaridan 10 baravarigacha, mansabdor shaxslarga esa 7 baravaridan 10 baravarigacha miqdorda jarima solishga sabab bo‘lishi o‘rnatilgan.
“Aksariyat hollarda iste’molchilar ba’zi insofsiz sotuvchilar tomonidan muddati o‘tgan mahsulotlarga ‘ikkinchi hayot’ berish orqali turli xil hiylalarni ishlatishga harakat qilishlariga duch kelishmoqda. Iste’molga yaroqsiz mahsulotni ‘ketkazish’ yo‘llari ko‘p, eng osoni — ularni o‘z vaqtida rastalardan olmaslik. Ko‘p hollarda e’tiborsiz iste’molchi tovar muddatiga ahamiyat bermaydi, shoshgan holda tovarni xarid qiladi. Yana bir keng tarqalgan yo‘li bu tovar markirovkasini, uni qaytadan (ustidan) yopishtirish, o‘chirish, boshqatdan markirovkalash orqali o‘zgartirish hisobiga tovarlarni sotuvga chiqarish hisoblanadi”, — deyiladi xabarda.
Agentlik mahsulot qadog‘ida uning ishlab chiqarilgan yili va oyi, tez buziladigan mahsulotlar (xavfsizligi ta’minlanishi uchun maxsus harorat va sharoit talab qiladigan va ularsiz inson hayoti uchun ziyon keltirishi mumkin bo‘lgan mahsulotlar), bolalar va parhezli oziqalar uchun kun va soati, ularni saqlash va iste’mol qilish (foydalanish) shartlari keltirilgan bo‘lishi kerakligini eslatib o‘tgan.
Sotuvchi tomonidan muddati o‘tgan tovarni almashtirib berish rad etilgan taqdirda 1159 qisqa raqami yoki @consumergovuz_bot Telegram boti orqali Iste’molchilar huquqlarini himoya qilish agentligiga murojaat qilish mumkin.
Izoh (0)