Монополияга қарши курашиш қўмитаси ҳузуридаги Истеъмолчилар ҳуқуқларини ҳимоя қилиш агентлиги «Истеъмолчиларнинг ҳуқуқларини ҳимоя қилиш тўғрисида»ги қонунга ўзгартириш киритиш тўғрисидаги қонун лойиҳасини ишлаб чиқди. Ўзгартириш яроқлилик муддати ўтган, ишлаб чиқарилган санаси ва яроқлилик муддати кўрсатилмаган, норматив талабларга жавоб бермайдиган, шунингдек, қалбаки товарлар савдосига қарши молиявий санкциялар қўллашни назарда тутади. Ҳужжат Олий Мажлис Қонунчилик палатасида иккинчи ўқишда кўриб чиқилмоқда.
Агентликнинг аниқлик киритишича, амалдаги қонунчиликка биноан қоидабузарларга нисбатан қўлланиладиган маъмурий жарималардан қатъи назар, БҲМнинг 50 баравари (12,25 миллион сўм) миқдоридаги молиявий санкция қўлланилади.
«Истеъмолчиларнинг ҳуқуқларини ҳимоя қилиш тўғрисида»ги қонуннинг 11-моддасига кўра, сотувчиларга ишлаб чиқарилган санаси ва яроқлилик муддати кўрсатилмаган ёки яроқлилик муддати ўтган товарларни қабул қилиш ҳамда реализация қилиш ман этилиши белгиланган. Маъмурий жавобгарлик тўғрисидаги кодекснинг 178-моддасида истеъмолчиларга била туриб нотўғри маълумотлар тақдим этганлик, шу жумладан, истеъмолчиларни товарнинг истеъмолга оид хусусиятлари ёки сифати хусусида чалғитиш туфайли истеъмолчиларга зарар етказиш — ҳуқуқбузарлик ашёларини мусодара қилиб, фуқароларга БҲМнинг 3 бараваридан 7 бараваригача, мансабдор шахсларга эса 7 бараваридан 10 бараваригача миқдорда жарима солишга сабаб бўлиши белгиланган.
Яроқлилик муддати ўтган товарларни, шунингдек, ишлаб чиқарилган санаси ва яроқлилик муддати кўрсатилиши шартлиги қонун ҳужжатларида назарда тутилган товарларни ишлаб чиқарилган санаси ва яроқлилик муддати кўрсатилмаган ҳолда реализация қилиш ҳамда сотиш учун қабул қилганлик — ҳуқуқбузарлик ашёларини мусодара қилиб, фуқароларга БҲМнинг 3 бараваридан 10 бараваригача, мансабдор шахсларга эса 7 бараваридан 10 бараваригача миқдорда жарима солишга сабаб бўлиши ўрнатилган.
«Аксарият ҳолларда истеъмолчилар баъзи инсофсиз сотувчилар томонидан муддати ўтган маҳсулотларга ‘иккинчи ҳаёт’ бериш орқали турли хил ҳийлаларни ишлатишга ҳаракат қилишларига дуч келишмоқда. Истеъмолга яроқсиз маҳсулотни ‘кетказиш’ йўллари кўп, энг осони — уларни ўз вақтида расталардан олмаслик. Кўп ҳолларда эътиборсиз истеъмолчи товар муддатига аҳамият бермайди, шошган ҳолда товарни харид қилади. Яна бир кенг тарқалган йўли бу товар маркировкасини, уни қайтадан (устидан) ёпиштириш, ўчириш, бошқатдан маркировкалаш орқали ўзгартириш ҳисобига товарларни сотувга чиқариш ҳисобланади», — дейилади хабарда.
Агентлик маҳсулот қадоғида унинг ишлаб чиқарилган йили ва ойи, тез бузиладиган маҳсулотлар (хавфсизлиги таъминланиши учун махсус ҳарорат ва шароит талаб қиладиган ва уларсиз инсон ҳаёти учун зиён келтириши мумкин бўлган маҳсулотлар), болалар ва парҳезли озиқалар учун кун ва соати, уларни сақлаш ва истеъмол қилиш (фойдаланиш) шартлари келтирилган бўлиши кераклигини эслатиб ўтган.
Сотувчи томонидан муддати ўтган товарни алмаштириб бериш рад этилган тақдирда 1159 қисқа рақами ёки @consumergovuz_bot Telegram боти орқали Истеъмолчилар ҳуқуқларини ҳимоя қилиш агентлигига мурожаат қилиш мумкин.
Изоҳ (0)