Qirg‘iziston prezidenti Sadir Japarov yaqinlashib kelayotgan xalqaro tadbirlar munosabati bilan masofaviy ish rejimiga o‘tdi. Bu haqda uning matbuot xizmatiga tayanib, “RBK” xabar berdi.
“Qirg‘iziston prezidenti Sadir Japarov ilgari rejalashtirilgan xalqaro tadbirlar munosabati bilan hamda mavjud keskin epidemiologik vaziyatni hisobga olib, vaqtincha masofaviy ish rejimiga o‘tdi”, — deyiladi xabarda.
Matbuot xizmati qaysi xalqaro tadbirlar haqida gap ketayotganiga aniqlik kiritmadi. 10-may kuni Japarov va Rossiya prezidenti Vladimir Putin may oyining oxirida Moskvada uchrashishga kelishib olgani haqida xabar berilgan edi.
Tomonlar ikki tomonlama hamkorlik va Yevrosiyo iqtisodiy integratsiyasining dolzarb masalalari, shuningdek, Kollektiv xavfsizlik shartnomasi tashkiloti (KXShT), Mustaqil Davlatlar Hamdo‘stligi (MDH) va Shanxay hamkorlik tashkiloti (ShHT) doirasida mintaqaviy xavfsizlikni ta’minlash bo‘yicha muhokama o‘tkazishi kutilmoqda. Kreml matbuot xizmati Japarov Putinning Rossiyaga ishchi tashrif bilan kelish taklifini qabul qilgani haqida xabar bergan.
2020-yilning sentabr oyida “Proyekt” nashri Putin bilan uchrashuv oldidan hammaga ikki haftalik karantindan o‘tish majburiyati yuklanayotgani haqida yozgan edi. Prezident matbuot kotibi Dmitriy Peskov nashr xabarini izohlar ekan, “kimdir ikki haftalik, kimdir bir necha kunlik karantindan o‘tadi, kimdir umuman karantinsiz qabul qilinadi” degan. Uning so‘zlariga ko‘ra, izolyatsiya davri uchrashmoqchi bo‘lgan kishining jadvaliga va epidemiologik vaziyatga bog‘liq.
Avval ham fevral oyida Japarov Rossiyaga tashrif uchun tayyorgarlik doirasida o‘z-o‘zini yakkalash rejimiga o‘tgan edi. Shuningdek, aprel oyida Putin bilan uchrashuvdan oldin Armaniston bosh vaziri Nikol Pashinyan o‘zini izolyatsiyaga olgan.
Aprel oyida Putin COVID-19 vaksinasining ikkinchi dozasini qabul qildi. Bir necha hafta o‘tgach, u antitanalar testidan o‘tgani, natijalar COVID-19’ga ijobiylik koeffitsiyenti 15 ga tengligini ko‘rsatgani haqida ma’lum qildi. “Shifokorlar bu yaxshi natija ekanini aytdi”, deb qo‘shimcha qilgan davlat rahbari.
Izoh (0)