AQSh prezidentining Milliy xavfsizlik bo‘yicha yordamchisi Jeyk Sallivan Armaniston va Ozarbayjonni chegaralarni belgilab olish bo‘yicha muzokaralar o‘tkazishga chaqirdi. Bu haqda Oq uy matbuot xizmatiga tayanib, “RBK” xabar berdi.
Oq uyning aniqlik kiritishicha, tegishli bayonot Sallivanning Armaniston bosh vaziri vazifasini bajaruvchi Nikol Pashinyan va Ozarbayjon prezidenti Ilhom Aliyev bilan alohida suhbatlarida berilgan.
Qayd etilishicha, suhbatlar chog‘ida AQSh prezidentining yordamchisi so‘nggi paytlarda ikki mamlakat chegarasidagi ziddiyatlardan xavotir bildirdi. U mintaqadagi qo‘shinlar harakati mas’uliyatsiz va provokatsion ekanligini ta’kidladi. Shu bilan birga, u Vashington ziddiyatli tomonlarni murosaga keltirishga intilayotganini ta’kidladi.
12-may kuni Armaniston Mudofaa vazirligi Ozarbayjon harbiylari “chegaralarni aniqlashtirish” bahonasida chegara hududlaridan birida ayrim harakatlarni amalga oshirayotgani haqida xabar berdi. Pashinyan hodisani mamlakat suverenitetiga tajovuz deb atadi. Uning so‘zlariga ko‘ra, Ozarbayjon harbiylari Sevlich ko‘li (Armanistonning Syunik viloyati va Ozarbayjonning Lochin viloyati o‘rtasida joylashgan) hududidan kesib o‘tib, 3,5 km ichkariga kirgan.
O‘z navbatida, Boku Armanistonning reaksiyasini asossiz deb atadi. Ularning fikriga ko‘ra, Armaniston bilan chegaradagi Ozarbayjonning Kelbajar va Lochin viloyatlariga chegara kuchlarini joylashtirish 2020-yil 10-noyabrdagi uch tomonlama kelishuvga muvofiq olib borilmoqda.
Ozarbayjon Armaniston bilan chegaradagi keskinlik fonida harbiy mashg‘ulotlar o‘tkazishni ham boshladi.
Izoh (0)