Qirg‘iziston Markaziy saylov komissiyasi (MSK) ma’lumotlariga ko‘ra, prezident saylovlarida yetakchilik qilayotgan Qirg‘iziston sobiq bosh vazir vazifasini bajaruvchi Sadir Japarov matbuot anjumani chog‘ida Rossiya bilan aloqalar haqida gapirib berdi, deb yozadi “RBK”.

Foto: “RIA Novosti”

“Rossiya bizning bosh strategik sherigimiz bo‘lgan va shunday bo‘lib qoladi”, — dedi u.

97,98 foiz ovozlar hisoblab chiqilganidan keyin MSK Sadir Japarov muddatidan ilgari prezident saylovlarida 79,2 foiz ovoz bilan yetakchilik qilayotganini ma’lum qildi. Dastlabki ma’lumotlarga ko‘ra, ikkinchi o‘rinda 6,69 foiz ovoz bilan Adaxan Madumarov, uchinchi o‘rinda — 2,38 foiz ovoz bilan Babirjan Tolbayev bormoqda.

10-yanvar, yakshanba kuni Qirg‘iziston prezidenti lavozimi uchun bo‘lib o‘tgan muddatidan ilgari saylovlarda jami 17 nomzod kurash olib bordi. Qolganlar 0,08 dan 1,4 foizgacha ovoz to‘plagan. Saylovda saylovchilarning 39,75 foizi qatnashgan.

Mamlakatda muddatidan ilgari saylovlar bilan birga, boshqaruv shakli haqida referendum ham bo‘lib o‘tdi. Ovoz berish byulleteniga uchta variant kiritildi: prezidentlik boshqaruvi, parlament boshqaruvi yoki ikkala variantga ham qarshilik. MSK ma’lumotlariga qaraganda, referendumda qatnashganlarning 80,99 foizi boshqaruvning prezident shakliga ovoz bergan. Referendumga saylovchilarning 39,88 foizi kelgan.

Saylovlarning yakuniy natijalari barcha byulletenlar qo‘lda sanab chiqilganidan keyin e’lon qilinadi.

Sadir Japarovning ba’zi raqiblari esa saylovning dastlabki natijalaridan norozi bo‘lib, ularni tan olmasligini bildirdi. Xususan, “Butun Qirg‘iziston” partiyasi yetakchisi Adaxan Madumarov elektron saylov qutilari bilan bog‘liq qalbakilashtirishlar haqida ma’lum qildi va ovoz berish yakunlarini tan olishdan bosh tortdi. “Men saylov yakunlarini tan olmayman. Bugungi vaziyat nomaqbul. Tekshirish niqobi ostida maxsus xizmatlar xodimlari keldi. Ular o‘zlari bilan fleshka olib yurgandi”, — dedi Madumarov.

Milliy xavfsizlik qo‘mitasi sobiq rahbari Abdil Segizbayev ham saylov natijalari yuzasidan e’tiroz bildirmoqchi. “Tabiiyki, o‘tgan yil oktabrida hokimiyatni egallab olganlar ma’muriy resurslardan foydalanishga urindi, biz bularning barchasini ko‘rdik. Hatto bu ishga kasalxonalar, maktablar xodimlarini ham jalb qilishga urinishdi”, — dedi u. Segizbayevning ta’kidlashicha, saylovlar qalbakilashtirilgan.

Qirg‘izistondagi prezident saylovi muddatidan avval o‘tkazildi – bu saylovning o‘tkazilishi 2020-yil oktabrida, parlament saylovlaridagi ehtimoliy qoidabuzarliklar sabab boshlangan tartibsizliklar tufayli avvalgi davlat rahbari So‘ronboy Jeenbekov iste’fo bergach e’lon qilingan edi.

Sadir Japarov oktabrdagi to‘polonlarga qadar tartibsizliklar keltirib chiqarishda ayblanib, 10 yillik ozodlikdan mahrum qilish jazosini o‘tayotgan edi. Namoyishchilar bosimi ostida u qamoqdan ozod qilindi, ertasiga esa parlament tomonidan bosh vazir etib tayinlandi. Jeenbekovning iste’fosidan keyin esa u prezident vazifasini bajaruvchiga aylangan edi.