Қирғизистон президенти Садир Жапаров яқинлашиб келаётган халқаро тадбирлар муносабати билан масофавий иш режимига ўтди. Бу ҳақда унинг матбуот хизматига таяниб, «РБК» хабар берди.
«Қирғизистон президенти Садир Жапаров илгари режалаштирилган халқаро тадбирлар муносабати билан ҳамда мавжуд кескин эпидемиологик вазиятни ҳисобга олиб, вақтинча масофавий иш режимига ўтди», — дейилади хабарда.
Матбуот хизмати қайси халқаро тадбирлар ҳақида гап кетаётганига аниқлик киритмади. 10 май куни Жапаров ва Россия президенти Владимир Путин май ойининг охирида Москвада учрашишга келишиб олгани ҳақида хабар берилган эди.
Томонлар икки томонлама ҳамкорлик ва Евросиё иқтисодий интеграциясининг долзарб масалалари, шунингдек, Коллектив хавфсизлик шартномаси ташкилоти (КХШТ), Мустақил Давлатлар Ҳамдўстлиги (МДҲ) ва Шанхай ҳамкорлик ташкилоти (ШҲТ) доирасида минтақавий хавфсизликни таъминлаш бўйича муҳокама ўтказиши кутилмоқда. Кремль матбуот хизмати Жапаров Путиннинг Россияга ишчи ташриф билан келиш таклифини қабул қилгани ҳақида хабар берган.
2020 йилнинг сентябрь ойида «Проект» нашри Путин билан учрашув олдидан ҳаммага икки ҳафталик карантиндан ўтиш мажбурияти юкланаётгани ҳақида ёзган эди. Президент матбуот котиби Дмитрий Песков нашр хабарини изоҳлар экан, «кимдир икки ҳафталик, кимдир бир неча кунлик карантиндан ўтади, кимдир умуман карантинсиз қабул қилинади» деган. Унинг сўзларига кўра, изоляция даври учрашмоқчи бўлган кишининг жадвалига ва эпидемиологик вазиятга боғлиқ.
Аввал ҳам февраль ойида Жапаров Россияга ташриф учун тайёргарлик доирасида ўз-ўзини яккалаш режимига ўтган эди. Шунингдек, апрель ойида Путин билан учрашувдан олдин Арманистон бош вазири Никол Пашинян ўзини изоляцияга олган.
Апрель ойида Путин COVID-19 вакцинасининг иккинчи дозасини қабул қилди. Бир неча ҳафта ўтгач, у антитаналар тестидан ўтгани, натижалар COVID-19’га ижобийлик коэффициенти 15 га тенглигини кўрсатгани ҳақида маълум қилди. «Шифокорлар бу яхши натижа эканини айтди», деб қўшимча қилган давлат раҳбари.
Изоҳ (0)