Qirg‘iziston prezidenti Rossiyaga tashrif oldidan o‘z-o‘zini yakkalash rejimiga o‘tdi

Qirg‘iziston prezidenti Sadir Japarov Rossiyaga tashrif uchun tayyorgarlik doirasida o‘z-o‘zini yakkalash rejimiga o‘tdi, deb xabar beradi “RIA Novosti” davlat rahbari matbuot xizmatiga tayanib.

“Sadir Nurgojoyevich Rossiyaga tashrifga tayyorlanmoqda, u tez orada amalga oshadi. Ayni paytda koronavirus pandemiyasi fonida epidemiologik xavfsizlikka rioya qilish maqsadida o‘zini o‘zi yakkalash rejimiga o‘tdi”, — dedi matbuot xizmati vakili.

Prezident apparatida aniqlik kiritishlaricha, tashrifning aniq sanasi hozircha noma’lum. Nashr manbasi avvalroq tashrif 24—25-fevral kunlari bo‘lib o‘tishini ma’lum qilgandi.

Qirg‘izistonning yangi prezidenti Sadir Japarov Rossiyani ko‘p marotaba mamlakatning asosiy strategik sherigi deb atagan. 10-yanvardagi saylovlarda g‘olib chiqqanidan keyin ko‘p o‘tmay, u ilk chet el safarini Rossiyaga amalga oshirishini bildirgandi.

Eslatib o‘tamiz, Sadir Japarov Qirg‘iziston prezidenti saylovida salkam 80 foiz ovoz olib g‘alaba qozondi.

Ma’lumot uchun, Qirg‘izistondagi prezident saylovi muddatidan avval o‘tkazildi — bu saylovning o‘tkazilishi 2020-yil oktabrida parlament saylovlaridagi ehtimoliy qoidabuzarliklar sabab boshlangan tartibsizliklar tufayli avvalgi davlat rahbari So‘ronboy Jeenbekov iste’fo bergach e’lon qilingan edi.

Sadir Japarov oktabrdagi to‘polonlarga qadar tartibsizliklar keltirib chiqarishda ayblanib, 10 yillik ozodlikdan mahrum qilish jazosini o‘tayotgan edi. Namoyishchilar bosimi ostida u qamoqdan ozod qilindi, ertasiga esa parlament tomonidan bosh vazir etib tayinlandi. Jeenbekovning iste’fosidan keyin esa u prezident vazifasini bajaruvchiga aylangan edi.