AQSh prezidenti Jo Baydenning ma’muriyati Isroilga 735 million dollarlik yuqori aniqlikdagi qurol-yarog‘ sotishni ma’qulladi. Bu haqda The Washington Post o‘z manbalariga tayanib xabar berdi, deb yozadi “RBK”.
Nashr manbalari taqdim etgan ma’lumotlarga ko‘ra, kongress bu haqda 5-may kuni — Isroil armiyasi va HAMAS o‘zaro raketa zarbalarini boshlashidan bir necha kun avval xabardor qilingan.
Ushbu partiyaning asosiy qismini GPS texnologiyasi asosidagi uskunalar komplektlarini tashkil qilishi mumkin, ular erkin tushadigan bombalarni boshqariladigan bombalarga aylantirish imkonini beradi. Bunday komplekt — Joint Direct Attack Munition (JDAM) — bombaning o‘rta qismiga mahkamlanadigan qanotlardan hamda bombaga manyovr qilish imkonini beruvchi boshqariluvchi “patlarga” ega dum qismidan iborat.
Rasman xabardor qilinganidan keyin qonun chiqaruvchilarda bitimning amalga oshirilishiga qarshi norozilik haqida rezolyutsiya berish uchun 20 kun vaqt bo‘ladi. Bu hujjat yuridik kuchga ega emas.
Turkiya prezidenti Rajab Toyyib Erdo‘g‘on Isroilga qurol sotish haqidagi qarori uchun amerikalik hamkasbi Jo Baydenni tanqid qildi.
“Janob Bayden, afsuski, siz tarixni qonga belangan qo‘llaringiz bilan yozyapsiz. Mana shu gapni aytishga bizni majbur qildingiz”, — dedi u Anqaradagi matbuot anjumanida AQSh ma’muriyati Isroilga qurol-yarog‘ sotishni ma’qullagani haqidagi xabarlarni izohlar ekan.
Erdo‘g‘onning fikricha, ayni paytda Falastindagi fojiadan yuz o‘girayotgan mamlakatlar “o‘z zarariga bo‘lg‘usi muammolar urug‘larini sochmoqda”.
Falastin—Isroil nizosining 2014-yildan buyon kuzatilgan eng kuchli avj olishi may oyida Isroil hukumatining Quddusda bir qator arab oilalarini ko‘chirib yuborish qaroridan keyin boshlandi. Bu noroziliklarni keltirib chiqardi hamda Quddusda arab namoyishchilar va Isroil politsiyasi o‘rtasidagi to‘qnashuvlarga sabab bo‘ldi.
Vaziyatga HAMAS aralashdi. Isroil uning politsiyani olib ketish haqidagi talablarini bajarmaganidan keyin, guruh raketalar otishni boshladi. Bunga javoban Isroil G‘azo sektorini o‘qqa tutdi.
G‘azo sektori ziddiyat kuchayganidan buyon 200 dan ortiq falastinlik halok bo‘lib, 5 mingdan ziyodi jabrlanganini ma’lum qildi. Isroil tomoni o‘n nafar qurbon va 50 ga yaqin og‘ir yaradorlar borligi haqida xabar bermoqda.
Izoh (0)