Isroil HAMASning to‘qqiz nafar qo‘mondoni uylariga aviazarba berganini ma’lum qildi

Isroil harbiy aviatsiyasi so‘nggi bir necha soat ichida G‘azo sektoridagi HAMAS harakatining to‘qqiz nafar qo‘mondoni uylariga zarba berdi. Bu haqda Isroil mudofaa kuchlari ma’lum qildi, deb yozadi The Times of Israel.

“Hujum qilingan uylardan terrorchilik infratuzilmasi sifatida foydalanilgan, ayrimlarida esa qurol omborlari bo‘lgan”, — deyladi Isroil harbiylarining bayonotida.

Ta’kidlanishicha, Beyt-Xanun shahar brigada komandiri, Beyt-Xanun rota komandiri, G‘azo shahar rota komandiri va Al-Shati brigada qo‘mondonining uylari havo hujumiga uchragan. “HAMAS harbiy razvedkasi tomonidan foydalanilgan Shexaya hududidagi uy ham nishonga olindi”, — deya qo‘shimcha qildi Isroil armiyasi.

Bundan tashqari, Isroil mudofaa kuchlari HAMAS harakatining bolalar bog‘chasi va masjid yonida qazilgan yerosti yo‘llariga raketa tashlangani haqida xabar bergan.

17-may, dushanba kuni erta tongda Isroil mudofaa kuchlari G‘azo sektoriga aviazarbalar yo‘llashni qayta boshladi. HAMAS ham Isroilning tinch aholi punktlarini o‘qqa tutishni davom ettirdi. Mojaroning hozirgi keskinlashuvi va zarbalar almashinuvi bir haftadan beri davom etmoqda.

15-may, shanba kuni Isroil havo kuchlari G‘azo sektoridagi mahalliy va xalqaro ommaviy axborot vositalari jumladan Associated Press va Al Jazeera telekanallarining ofislari joylashgan binoga hujum qildi. Jurnalistlar hujumdan oldin binoni tark etgan. Keyinchalik OAV Isroildan tahririyatlar binosining yo‘q qilinishiga izoh talab qildi. Isroil mudofaa kuchlari mazkur binoda HAMAS razvedka shtab-kvartirasi joylashganini aytib, u yerdagi OAV va jurnalistlardan niqob siatida foydalanilganini da’vo qildi.

16-mayga o‘tar kechasi Isroil mudofaa armiyasi G‘azo sektorida HAMAS harakatining siyosiy byurosi yetakchisi Yahyo Sinvarning uyiga raketa zarbasi bergani haqida xabar berilgan.

Falastin—Isroil nizosining 2014-yildan buyon kuzatilgan eng kuchli avj olishi may oyida Isroil hukumatining Quddusda bir qator arab oilalarini ko‘chirib yuborish qaroridan keyin boshlandi. Bu noroziliklarni keltirib chiqardi hamda Quddusda arab namoyishchilar va Isroil politsiyasi o‘rtasidagi to‘qnashuvlarga sabab bo‘ldi.

Vaziyatga HAMAS aralashdi. Isroil uning politsiyani olib ketish haqidagi talablarini bajarmaganidan keyin, guruh raketalar otishni boshladi. Bunga javoban Isroil G‘azo sektorini o‘qqa tutdi.