Foto: G‘azoda Isroil aviazarbalari oqibatida halok bo‘lganlar soni 180 dan oshdi, ularning 55 nafari bolalar
Isroilning G‘azo sektoriga bergan havo zarbalari oqibatida halok bo‘lgan falastinliklar soni 188 nafarga yetdi, ularning 55 nafari bolalardir. Bu haqda G‘azo sektori Sog‘liqni saqlash vazirligi bayonotiga tayanib, “RIA Novosti” xabar bermoqda.
“Nizo keskinlashganidan buyon Isroilning G‘azo sektoriga bergan aviazarbalari oqibatida halok bo‘lgan falastinliklarning umumiy soni 188 nafarga yetdi, ularning 55 nafari bolalar va 33 nafari ayollardir. Yana 1230 kishi yaralangan”, — deyiladi bayonotda.
Isroil va G‘azo sektori chegarasidagi vaziyat 10-may oqshomida keskinlashib ketgan edi. 16-may holatiga ko‘ra, Isroilning o‘zida G‘azo sektoridan uchirilgan raketa zarbalari oqibatida 10 kishi halok bo‘lgan, taxminan, 50 kishi yaralangan.
BMT Xavfsizlik kengashining Sharqiy Quddus va G‘azo sektoridagi vaziyatning keskinlashuviga bag‘ishlangan birinchi ochiq majlisi 16-may, yakshanba kuni o‘tkazilishi kutilmoqda. Unda tashkilot bosh kotibi Antoniu Guterresh, Yaqin Sharqdagi vaziyatni tartibga solish bo‘yicha maxsus muvofiqlashtiruvchi Tor Vennesland, Isroil va Falastin vakillarining chiqish qilishi kutilmoqda.
