Исроил ҲАМАСнинг тўққиз нафар қўмондони уйларига авиазарба берганини маълум қилди

Исроил ҳарбий авиацияси сўнгги бир неча соат ичида Ғазо секторидаги ҲАМАС ҳаракатининг тўққиз нафар қўмондони уйларига зарба берди. Бу ҳақда Исроил мудофаа кучлари маълум қилди, деб ёзади The Times of Israel.

«Ҳужум қилинган уйлардан террорчилик инфратузилмаси сифатида фойдаланилган, айримларида эса қурол омборлари бўлган», — дейлади Исроил ҳарбийларининг баёнотида.

Таъкидланишича, Бейт-Ханун шаҳар бригада командири, Бейт-Ханун рота командири, Ғазо шаҳар рота командири ва Ал-Шати бригада қўмондонининг уйлари ҳаво ҳужумига учраган. «ҲАМАС ҳарбий разведкаси томонидан фойдаланилган Шехая ҳудудидаги уй ҳам нишонга олинди», — дея қўшимча қилди Исроил армияси.

Бундан ташқари, Исроил мудофаа кучлари ҲАМАС ҳаракатининг болалар боғчаси ва масжид ёнида қазилган ерости йўлларига ракета ташлангани ҳақида хабар берган.

17 май, душанба куни эрта тонгда Исроил мудофаа кучлари Ғазо секторига авиазарбалар йўллашни қайта бошлади. ҲАМАС ҳам Исроилнинг тинч аҳоли пунктларини ўққа тутишни давом эттирди. Можаронинг ҳозирги кескинлашуви ва зарбалар алмашинуви бир ҳафтадан бери давом этмоқда.

15 май, шанба куни Исроил ҳаво кучлари Ғазо секторидаги маҳаллий ва халқаро оммавий ахборот воситалари жумладан Associated Press ва Al Jazeera телеканалларининг офислари жойлашган бинога ҳужум қилди. Журналистлар ҳужумдан олдин бинони тарк этган. Кейинчалик ОАВ Исроилдан таҳририятлар биносининг йўқ қилинишига изоҳ талаб қилди. Исроил мудофаа кучлари мазкур бинода ҲАМАС разведка штаб-квартираси жойлашганини айтиб, у ердаги ОАВ ва журналистлардан ниқоб сиатида фойдаланилганини даъво қилди.

16 майга ўтар кечаси Исроил мудофаа армияси Ғазо секторида ҲАМАС ҳаракатининг сиёсий бюроси етакчиси Яҳё Синварнинг уйига ракета зарбаси бергани ҳақида хабар берилган.

Фаластин—Исроил низосининг 2014 йилдан буён кузатилган энг кучли авж олиши май ойида Исроил ҳукуматининг Қуддусда бир қатор араб оилаларини кўчириб юбориш қароридан кейин бошланди. Бу норозиликларни келтириб чиқарди ҳамда Қуддусда араб намойишчилар ва Исроил полицияси ўртасидаги тўқнашувларга сабаб бўлди.

Вазиятга ҲАМАС аралашди. Исроил унинг полицияни олиб кетиш ҳақидаги талабларини бажармаганидан кейин, гуруҳ ракеталар отишни бошлади. Бунга жавобан Исроил Ғазо секторини ўққа тутди.