17-may, dushanba kunidan Turkiyada koronavirus bilan kasallanish darajasining o‘sishi munosabati bilan kiritilgan cheklovlar yumshatiladi. Anadolu xabariga ko‘ra, Turkiya Ichki ishlar vazirligi “Bosqichma-bosqich normal hayotga qaytish to‘g‘risida”gi dastur hududiy hokimiyatlarga yuborilgan, deb yozadi “RBK”.
Endi fuqarolar ish vaqtidan tashqarida avtobus va poyezdlarning 50 foiz qismi yo‘lovchilar bilan to‘lish sharti bilan jamoat transportida shaharlararo safarlarni amalga oshirishi mumkin bo‘ladi. Voyaga yetmaganlar va 65 yoshdan oshgan fuqarolar bundan mustasno.
Bundan tashqari, savdo markazlari, xo‘jalik va galantereya do‘konlari ish kunlari 10:00 dan 20:00 gacha ishlaydi. Oziq-ovqat do‘konlari va bozorlar dam olish kunlari ham ishlashi mumkin, faqat ularning ish vaqti 10:00 dan 17:00 gacha chegaralanadi.
Ayni vaqtda ish kunlari 21:00 dan 5:00 gacha, dam olish kunlari esa kecha-yu kunduz davom etadigan komendantlik soati 1-iyungacha saqlanib qoladi. Turkiya IIV ko‘rsatmasida alohida aytilishicha, bu choralar sayyohlar va Turkiyaga qisqa muddatga kelganlar uchun amal qilmaydi, ammo mamlakatda istiqomat qiluvchi chet elliklar ularga amal qilishi kerak.
Aprel oyi o‘rtalarida Turkiya hukumati COVID-19’ga chalinish holatining ortishi munosabati bilan cheklov choralarini kuchaytirdi. Mamlakatda komendantlik soati davomiyligi soat 19:00 dan 05:00 gacha uzaytirildi, restoran va kafelarga faqat yetkazib berish va olib ketish rejimida ishlashga ruxsat berildi, sport zallari yopildi, yopiq binolarda tadbir o‘tkazish taqiqlandi.
May oyida Turkiyada yangi chora-tadbirlar kuchga kirdi, unga ko‘ra, do‘konlarda faqat asosiy oziq-ovqat va gigiyena mahsulotlarini sotishga ruxsat berildi. Shu tarzda ilgari spirtli ichimliklar savdosiga qo‘yilgan taqiq endilikda elektronika, o‘yinchoqlar, ofis buyumlari, kiyim-kechak, avtoulov aksessuarlari, dasturxon va tomorqa buyumlari uchun ham amal qila boshladi.
14-may kuni Turkiya prezidenti Rajab Toyyib Erdo‘g‘on 17-maydan cheklovlarni bosqichma-bosqich bekor qilishni rejalashtirilayotgani, iyun oyiga kelib Turkiya o‘z fuqarolarining hayotini yanada yengillashtirish uchun cheklov choralarini “sezilarli darajada yumshatmoqchi”ligini aytgan edi.
Turkiya Sog‘liqni saqlash vazirligi ma’lumotlariga ko‘ra, 15-may holatiga mamlakatda 11,5 ming kishida koronavirus aniqlangan, 236 kishi virusdan vafot etgan. Pandemiya boshidan buyon 5,1 million kishi kasallanib, 44,5 ming odam hayotdan ko‘z yumgan.
Izoh (0)