Bolani bog‘chaga joylashtirish — ko‘pchilik ota-onalar duch keladigan muhim bosqichlardan biridir. Raqamlashtirish jarayoni va maktabgacha ta’lim muassasalariga talab ortib borayotgan bir paytda, O‘zbekistonda qabul tizimi qanday ishlashi, kimlar imtiyozga ega ekani va qanday tibbiy hujjatlar tayyorlanishi kerakligini bilish zarur.
O‘zbekistonda bolani maktabgacha ta’lim muassasasiga joylashtirish masalasi dolzarb muammo bo‘lib qolmoqda. Ota-onalar ariza topshirish tartibini, imtiyozga ega toifadagi bolalarni va zarur hujjatlar ro‘yxatini aniq bilishi katta ahamiyatga ega. Quyida davlat bog‘chalariga qabul qilish tizimi bo‘yicha asosiy ma’lumotlar keltiriladi.
MTMga qabul qilish yoshi va shartlari
Davlat maktabgacha ta’lim muassasalariga 3 yoshdan 7 yoshgacha bo‘lgan bolalar qabul qilinadi. 2022-yil aprel oyidan boshlab, agar bog‘chada bo‘sh o‘rinlar bo‘lsa, 2 yoshli bolalarni ham qabul qilishga ruxsat berilgan. Bunday holatda xizmat pullik asosda ko‘rsatiladi. Xususiy bog‘chalar esa bolalarni qabul qilish yoshi va shartlarini mustaqil ravishda belgilaydi.
Ariza topshirish tartibi
Bog‘chaga qabul qilish uchun ariza berishning ikki usuli mavjud:
1. Turar joy hududiga ko‘ra davlat xizmatlari markaziga borib, shaxsan murojaat qilish;
2. Onlayn tarzda — my.gov.uz portali orqali.
Davlat xizmatlari markazida maxsus ilova asosida ariza beriladi. Unda bola va ota-onaga oid ma’lumotlar ko‘rsatiladi, shuningdek, aniq bir maktabgacha ta’lim muassasasi tanlanadi. Tizim avtomatik tarzda tanlangan bog‘chada bo‘sh o‘rinlar mavjud yoki yo‘qligini ko‘rsatadi. Agar bo‘sh o‘rinlar bo‘lmasa, ota-onalar boshqa bog‘chani tanlashi yoki birdaniga ikki muassasa bo‘yicha navbatga yozilishi mumkin. Bo‘sh o‘rin paydo bo‘lgach, yo‘llanma bir ish kuni ichida beriladi.
Muhim: bu yo‘llanmani 15 kun ichida bog‘chaga topshirish kerak, aks holda u o‘z kuchini yo‘qotadi va qaytda navbatga yozilish kerak bo‘ladi.
Taqdim etgan anketada ishonchsiz yoki noto‘g‘ri ma’lumotlarning mavjudligi yo‘llanmalar berishning rad etilishi uchun asos hisoblanadi. Boshqa asoslar bo‘yicha yo‘llanma berishni rad etishga yo‘l qo‘yilmaydi.
Kimlar birinchi navbatda qabul qilinadi?
Quyidagi shaxslarga bolani bog‘chaga qo‘yishda imtiyozlar beriladi:
- I va II guruh nogironligi bo‘lgan shaxslarning bolalari;
- ko‘p bolali oilalarning bolalari;
- yetim bolalar yoki ota-onasining qarovisiz qolgan bolalar;
- “Ayollar daftari”ga kiritilgan ijtimoiy himoyaga muhtoj yolg‘iz ayollarning bolalari;
- kontrakt bo‘yicha harbiy xizmatchilarning va ichki ishlar organlari xodimlarining bolalari;
- talabalar va pedagoglarning bolalari;
- akalari yoki opalari ushbu muassasaning tarbiyalanuvchilari jumlasidan bo‘lgan bolalar;
- boshqa MTMdan ko‘chirilgan bolalar.
Bolani bog‘chaga berish uchun onlayn ariza topshirish
Bolalarni davlat maktabgacha ta’lim muassasasiga joylashtirish bo‘yicha onlayn ariza berish imkoniyati yaratilgan. Xizmatdan Yagona portal orqali foydalanish bepul va buning uchun ortiqcha hujjat talab etilmaydi.
- Dastlab, my.gov.uz platformasidan OneID bilan shaxsiy hisobga kiriladi. So‘ng, “Oila va bolalar” sahifasidan “Bolani bog‘chaga joylashtirish” xizmati tanlanadi.
Mazkur xizmat tanlagandan keyin “Xizmatdan foydalanish” tugmasi bosiladi va navbatdagi sahifada telefon raqam kiritiladi. So‘ng bog‘chaga joylashtiriladigan farzand tanlanadi. Agar ma’lumotlar avtomatik shakllanmasa, ularni qo‘lda kiritib chiqish kerak.
Bu jarayonda dastlab tug‘ilganlik to‘g‘risidagi hujjat shakli belgilanadi, keyingi qatorda guvohnoma seriyasi va raqami kiritilsa, bola va ona haqidagi ma’lumotlar avtomatik shakllanadi.
2. Agar ariza beruvchida bog‘chaga joylashish uchun imtiyoz mavjud bo‘lsa, Davlat xizmatlari markaziga murojaat qilishi kerak.
3. Bola haqidagi ma’lumotlar to‘ldirilgach, hudud, tuman va maktabgacha ta’lim muassasasi raqami yoki nomi belgilanadi.
4. So‘ng xaritada tumandagi maktabgacha ta’lim muassasalarining joylashgan manzili ko‘rsatiladi.
Xaritaning pastki qismida arizachi tanlagan bog‘chasi haqida ma’lumotlar paydo bo‘ladi: qaysi mahallada joylashgani, muassasa rahbari ism-familiyasi, sig‘imi, joylashtirilgan bolalar soni, hozirda mavjud navbat va imtiyozli navbatlar soni ko‘rsatiladi.
5. So‘ng, guruhlar soni, nechta bola qabul qilinishi va hozirda mavjud bo‘sh joylar hamda qabul qilinishi kutilayotganlar soni haqida ma’lumotlar taqdim etiladi.
So‘ng, bo‘sh joy mavjud bo‘lgan guruh tanlanib ariza jo‘natiladi. Keyingi bo‘limlarda navbatni tekshirish va navbatdan chiqarish amallarini bajarish mumkin.
Ushbu muddat o‘tgandan keyin taqdim etilgan yo‘llanmalar qabul qilinmaydi. Bola bog‘chaga yo‘llanma taqdim etilgandan keyin bir ish kuni ichida qabul qilinadi.
Qanday tibbiy hujjatlar talab qilinadi?
Yo‘llanmani olgach, bola uchun 026-shakldagi tibbiy kartani rasmiylashtirish kerak bo‘ladi. Buning uchun bola quyidagi mutaxassislar ko‘rigidan o‘tishi lozim:
- stomatolog,
- endokrinolog,
- ortoped,
- oftalmolog,
- yashash joyiga qarashli oilaviy shifokor.
Shuningdek, quyidagi tahlillar topshirilishi kerak:
- umumiy qon va siydik tahlili,
- gijjalarga qarshi uch xil tahlil,
- 063-shakldagi emlash sertifikati — unda bola Milliy emlash kalendariga muvofiq emlangani tasdiqlanishi lozim.
Agar bolaga emlash mumkin emasligi haqida tibbiy ko‘rsatma bo‘lsa, unga davolanish davri tugaguniga qadar vaqtincha kechiktirish huquqi berilishi mumkin. Agar bolaning sog‘lig‘ida jiddiy muammolar, masalan, serebral falaj (DCP) yoki epilepsiya aniqlansa, mos sharoitlar va yondashuv mavjud bo‘lgan maxsus maktabgacha ta’lim muassasalarini tanlash tavsiya etiladi.
Izoh (0)