Farg‘onada 200 dollar pora bilan qo‘lga tushgan bog‘cha mudirasiga jazo tayinlandi

Iqtisodiy jinoyatlarga qarshi kurashish departamentining Farg‘ona viloyat boshqarmasi tomonidan o‘tkazilgan tadbirlar davomida ishga kiritib qo‘yish evaziga fuqarolardan pora talab qilgan bog‘cha mudiralari qo‘lga olingan. Bu haqda “Daryo”ga departamentning viloyat boshqarmasi jamoatchilik bilan aloqalar va huquqiy axborot bo‘limi ma’lum qildi.

Shuningdek, Qo‘qon shahridagi 64-ixtisoslashtirilgan davlat maktabgacha ta’lim tashkiloti mudirasi E.I. tomonidan ham yuqoridagiga o‘xshash jinoyat sodir etilgan. U 2020-yilning iyun oyida tug‘ruq ta’tilidan qaytib, ishlash istagini bildirgan M.M.dan pora olishga uringan.

Mudira bog‘cha oshpazi R.X. vositachiligida fuqaro M.M.dan kimyoviy ishlov berilgan pullarni pora tariqasida olgan vaqtida ashyoviy dalillar bilan ushlangan.

Bog‘cha mudiralari Jinoyat kodeksining 210-moddasi 1-qismi bilan aybdor deb topilib, ularga ikki yil muddatga mansabdor va moddiy javobgarligi bo‘lgan lavozimlarda ishlamaslik va uch yilga ozodlikni cheklash jazosi tayinlangan.

Qayd etilishicha, departament xodimlari tomonidan Furqat tumanidagi davlat bog‘chalaridan biri o‘rganilganda 2016—2020-yillar davomida aslida ishlamagan 9 nafar shaxs — “o‘lik jonlar” nomiga ish haqi yozilib, budjet mablag‘lari talon-toroj qilingani aniqlangan.

2020-yil davomida o‘tkazilgan nazorat tadbirlari davomida prokuratura idoralari tomonidan davlat maktabgacha ta’lim tashkilotlarining 20 nafar xodimiga nisbatan intizomiy, 51 nafariga nisbatan ma’muriy javobgarlik to‘g‘risida ish qo‘zg‘atilgan.