Иқтисодий жиноятларга қарши курашиш департаментининг Фарғона вилоят бошқармаси томонидан ўтказилган тадбирлар давомида ишга киритиб қўйиш эвазига фуқаролардан пора талаб қилган боғча мудиралари қўлга олинган. Бу ҳақда «Дарё»га департаментнинг вилоят бошқармаси жамоатчилик билан алоқалар ва ҳуқуқий ахборот бўлими маълум қилди.
Таъкидланишича, Тошлоқ туманидаги давлат мактабгача таълим ташкилоти мудираси фуқаро Д.Т.ни 0,5 ставка ишга олиш учун ундан 200 доллар миқдорида пора талаб қилган ва жиноят устида ашёвий далиллар билан қўлга олинган.Шунингдек, Қўқон шаҳридаги 64-ихтисослаштирилган давлат мактабгача таълим ташкилоти мудираси Э.И. томонидан ҳам юқоридагига ўхшаш жиноят содир этилган. У 2020 йилнинг июнь ойида туғруқ таътилидан қайтиб, ишлаш истагини билдирган М.М.дан пора олишга уринган.
Мудира боғча ошпази Р.Х. воситачилигида фуқаро М.М.дан кимёвий ишлов берилган пулларни пора тариқасида олган вақтида ашёвий далиллар билан ушланган.
Боғча мудиралари Жиноят кодексининг 210-моддаси 1-қисми билан айбдор деб топилиб, уларга икки йил муддатга мансабдор ва моддий жавобгарлиги бўлган лавозимларда ишламаслик ва уч йилга озодликни чеклаш жазоси тайинланган.
Қайд этилишича, департамент ходимлари томонидан Фурқат туманидаги давлат боғчаларидан бири ўрганилганда 2016—2020 йиллар давомида аслида ишламаган 9 нафар шахс — «ўлик жонлар» номига иш ҳақи ёзилиб, бюджет маблағлари талон-торож қилингани аниқланган.
2020 йил давомида ўтказилган назорат тадбирлари давомида прокуратура идоралари томонидан давлат мактабгача таълим ташкилотларининг 20 нафар ходимига нисбатан интизомий, 51 нафарига нисбатан маъмурий жавобгарлик тўғрисида иш қўзғатилган.
Мавзуга доир:
- Бухорода туғруқ мажмуаси реанимация бўлими мудири пора билан қўлга тушди
- Самарқандда ёнидан гиёҳванд моддаси чиққан шахс бу ишни босди-босди қилиш учун ИИБ ходимига 2 минг доллар пора бераётганда ушланди
- Жиззах шаҳар ҳокимининг биринчи ўринбосари вазифасини бажарувчи шахс 2 минг доллар пора олаётганда ушланди
Изоҳ (0)