Afg‘onistondagi voqealar munosabati bilan Tojikiston prezidenti chegaralar mudofaasini kuchaytirishni buyurdi

Tojikiston prezidenti Emomali Rahmon 10-may kuni respublika hukumat a’zolari, davlat rahbarining ijro apparati va boshqa davlat tuzilmalari rahbariyati bilan amaliy uchrashuv o‘tkazdi.

Tojikiston—Afg‘oniston chegarasidagi mavjud vaziyatga aloqador holda, davlat rahbari mamlakat xavfsizlik idoralari rahbarlariga zudlik bilan davlat chegaralari muhofazasini ta’minlash hamda jinoyatchilikka, ayniqsa ekstremizm, terrorizm va giyohvand moddalar savdosiga qarshi kurashish bo‘yicha choralarni kuchaytirishni buyurdi.

Davlat rahbari matbuot xizmati xabar berishicha, bir kun oldin Emomali Rahmon Afg‘oniston prezidenti Muhammad Ashraf G‘aniga hamdardlik telegrammasini yubordi.

O‘zining xabarida u “Kobulning g‘arbiy qismida sodir bo‘lgan dahshatli terrorchilik hujumi natijasida tinch aholi, shu jumladan yosh qizlar orasida ko‘plab qurbonlar va jabrlanganlar to‘g‘risidagi xabarni eshitib, chuqur qayg‘u va cheksiz nafratga to‘lganini” ta’kidlagan.

“Muborak Ramazon oyining so‘nggi kunlarida yovuz kuchlar tomonidan qilingan bu shafqatsiz va halokatli zo‘ravonlik harakatini kechirib bo‘lmaydi. Biz terrorizm va ekstremizmning har qanday ko‘rinishini qat’iyan qoralaymiz va zamonamizning ushbu global tahdidlariga qarshi kurashni kuchaytirish zarurligini yana bir bor ta’kidlaymiz”, — deyiladi telegrammada.

Emomali Rahmon o‘z nomidan va butun Tojikiston xalqi nomidan qurbonlarning qarindoshlari va do‘stlariga dildan hamdardlik va qo‘llab-quvvatlash so‘zlarini izhor etib, barcha jabrlanganlar tezroq sog‘ayib ketishini tilagan.

Avvalroq Afg‘onistonning Zabul viloyatida mina qo‘yilgan yo‘ldan o‘tayotgan yo‘lovchi avtobusining portlashi oqibatida kamida 16 kishi halok bo‘lgani haqida xabar berilgandi.

Bundan avval, 8-may kuni Kobuldagi qizlar maktabida bir nechta portlashlar sodir etilgan edi. So‘nggi ma’lumotlarga ko‘ra, hodisada 68 kishi halok bo‘lgan, aksariyati 11-15 yoshdagi o‘quvchi qizlar.

Afg‘oniston prezidenti Ashraf G‘ani Kobuldagi portlashda “Tolibon” jangari guruhini aybladi. Ayni vaqtda “Tolibon”ning o‘zi ham ushbu hujumni qoraladi.

“Tolibon” harakati musulmonlarning muqaddas oyi — Ramazon yakunida nishonlanadigan hayit bayrami munosabati bilan uch kun davomida harbiy harakatlarni to‘xtashini e’lon qildi.