Hindistonda Ganga daryosidan o‘nlab COVID-19 qurbonlarining jasadlari topildi

Hindistonning Bixar shtatida Ganga daryosidan COVID-19 tufayli vafot etgani taxmin qilinayotgan kamida o‘ttiz kishining jasadi topildi. Bu haqda Times of India gazetasiga tayanib, “RBK” xabar berdi.

Gazetaning mahalliy ma’muriyatga asoslanib xabar berishicha, jasadlar bir necha kun oldin qo‘shni Uttar-Pradesh shtatidan daryoga tashlangan bo‘lishi mumkin.

Mahalliy aholining ta’kidlashicha, qirg‘oq bo‘yidagi qishloqlarda yashovchilar marhumlarning jasadlarini daryoga tashlab yubormoqda, chunki ularni kuydirish va dafn gulxanlarini yoqish qimmatga tushadi.

Aholining so‘zlariga ko‘ra, daryoda taxminan 100-150 kishining jasadi bo‘lishi mumkin. O‘z navbatida, The Tribune gazetasi mahalliy hokimiyatga asoslanib, Gangada 48 ta jasad topilgani haqida xabar berdi.

Buksar shahri sudyasi Aman Samirning aytishicha, mutasaddilar koronavirusdan vafot etganlarning jasadini hindlar uchun an’anaviy bo‘lgan gulxanda yoqish o‘rniga, daryoga tashlaganlarga qarshi qat’iy choralar ko‘radi.

Ta’kidlanishicha, hokimiyat suvni tozalashga kirishgan. Noma’lum jasadlar dafn marosimlariga muvofiq yoqiladi. Bunday holda, xarajatlarni shtat hukumati qoplaydi.

Hindiston koronavirusga chalinganlar sonining ko‘pligi bo‘yicha dunyoda ikkinchi o‘rinda turadi. Mamlakat Sog‘liqni saqlash vazirligining ma’lumotlariga ko‘ra, epidemiya boshlanganidan beri 22,6 milliondan ortiq kishida kasallik qayd etilgan, 246 ming kishi vafot etgan. Ayni paytda Hindistonda 3,7 million kishi koronavirus bilan yashamoqda.

Avvalroq Hindistonda COVID-19 bilan kasallangan bemorlarda “qora zamburug‘” (mukormikoz) epidemiyasi qayd etilayotgani haqida xabar berilgandi.  Hindistonlik mutaxassis Akshay Nairning fikricha, mukoromikoz bilan kasallanish darajasining o‘sishi koronavirusning og‘ir shaklini davolashda steroidlardan foydalanish sabab bo‘lgan bo‘lishi mumkin. “Qora zamburug‘”dan o‘lim darajasi 50 foizni tashkil etadi.