Afg‘oniston poytaxti Kobuldagi qizlar maktabiga hujum uyushtirilib, uning yaqinida sodir bo‘lgan portlashda, so‘nggi ma’lumotlarga ko‘ra, 55 kishi halok bo‘lib, 150 dan ortiq odam yaralandi. Portlash Kobulning g‘arbiy Dasht-e-Barchi tumanida yuz berdi.

Foto: Reuters

Tolo News manbalariga ko‘ra, maktabda uchta portlash sodir etilgan: dastlab mashina portlagan, so‘ng ikkita raketa uchirilgan. Maktab o‘qituvchisining ma’lum qilishicha, qurbonlarning ko‘pchiligi — maktabda o‘qiydigan 11—15 yoshli qizlar.

Foto: Reuters

Voqea joyiga bir nechta tez yordam mashinalari yuborilgan, ular yaradorlarni evakuatsiya qilgan. Ammo hodisa yuz bergan joyda g‘azablangan olomon tibbiyot xodimlarini do‘pposladi.

Foto: Reuters

Afg‘oniston prezidenti Ashraf G‘anining fikricha, portlash ortida “Tolibon” harakati turibdi. U hujumni insoniyatga qarshi qaratilgan jinoyat deb atadi. Uning so‘zlariga ko‘ra, “Tolibon”lar shunday harakatlari orqali Afg‘onistondagi tinchlik jarayonini “tormozlamoqda”.

Foto: AP Photo

Ayni vaqtda “Tolibon”ning o‘zi ham ushbu hujumni qoraladi.

Foto: AP Photo

Eslatib o‘tamiz, aprel oyida AQSh prezidenti Jozef Bayden Afg‘onistondan Amerika qo‘shinlarini olib chiqib ketish boshlanganini e’lon qilgan edi. Uning so‘zlariga ko‘ra, harbiylar mintaqada ularning oldiga qo‘yilgan barcha maqsadlarga erishgan. Qurolli Kuchlar 11-sentabrgacha to‘liq chiqarib ketilishi rejalashtirilgan. Amerika va NATO mamlakatlari qo‘shinlari 29-apreldan chiqib ketishni boshlagan.

Foto: AP Photo

Oq uy Amerika prezidentining ma’muriyati Tinch okeani yo‘nalishiga e’tiborni jamlashni rejalashtirayotganini aytdi. Ayni vaqtda AQSh davlat kotibi Entoni Blinken Afg‘onistondan qo‘shinlar chiqarib ketilgach, mamlakatda hokimiyat tepasiga “Tolibon”lar kelishi mumkinligini istisno qilmadi.

Foto: Reuters