Jons Hopkins universiteti ma’lumotlariga ko‘ra, dunyoda koronavirus bilan kasallanganlar soni 158 988 250 kishiga yetdi. Virusni yuqtirib olganlar soni bo‘yicha AQSh (32,7 million), Hindiston (22,9 million), Braziliya (15,2 million), Fransiya (5,8 million) va Turkiya (5 million) yetakchilik qilmoqda.
COVID-19 oqibatidagi o‘limlar soni esa dunyo bo‘yicha 3 304 921 tani tashkil qilmoqda.
BMT o‘z xodimlarini Rossiyaning “Sputnik V” vaksinasi bilan emlaydi
BMT Rossiyaning koronavirusga qarshi “Sputnik V” vaksinasini qo‘llashni boshlamoqchi. Bu haqda tashkilot bosh kotibi Antoniu Guterrish ma’lum qildi. Uning aytishicha, BMT Jahon sog‘liqni saqlash tashkiloti vaksinani tasdiqlashini kutmoqda. BMTning “Sputnik V” ma’qullangan davlatlardagi xodimlari allaqachon ushbu dori bilan emlanmoqda.“Avvalambor, BMTning ko‘pchilik xodimlari aynan Rossiya Federatsiyasida ‘Sputnik V’ vaksinasini olishga ulgurdi. Biz undan o‘zimiz foydalanish imkoniyatiga ega bo‘lishni istardik, ammo JSSTning uni ma’qullashini kutyapmiz, bu BMT faoliyati nuqtayi nazaridan zarurdir”, — dedi Guterrish.
“Biz, albatta, ‘Sputnik V’ bilan vaksinatsiya kampaniyasini o‘tkazayotgan mamlakatlarda ishlaydigan BMT xodimlarini ushbu vaksina bilan emlanishga chaqiramiz”, — deya qo‘shib qo‘ydi u.
Mavzuga doir: BMT bosh kotibi koronavirusga qarshi emlandi
Italiyada talaba qiz xatolik tufayli bir yo‘la oltita dozada emlandi
Italiyada 23 yoshli talab qiz Pfizer/BioNTech kompaniyasi vaksinasining bir yo‘la oltita dozasi bilan emlandi. U Massa-Karrara shahrida o‘zi amaliyot o‘tayotgan kasalxonaga kelib emlangan, ammo tibbiyot xodimlari yanglishib, unga bir yo‘la oltita dozani yuborgan. O‘z xatosini anglaganidan keyin xodimlar qizga bu haqda ma’lum qilishgan.Qiz kecha-yu kunduz nazorat ostida bo‘lib turish uchun kasalxonada qoldirilgan, 24 soatdan keyin uyiga javob berilgan. Ayni paytda uyida bo‘lgan qiz bosh og‘rig‘i va qo‘l sohasidagi noqulaylikdan shikoyat qilmoqda. Ammo u hamshirani sudga bermoqchi emas.
Ta’kidlanishicha, Pfizer vaksinasi har biri oltita dozaga mo‘ljallangan ampulalarda yetkaziladi. Qizni to‘liq bitta ampula bilan emlashgan. Ba’zi mutaxassislar fikricha, dorini oshiqcha miqdorda yuborish zarur samaraga olib kelmasligi mumkin.
Mavzuga doir: Litvada xatolik tufayli bir ayol birdaniga besh dozada koronavirus vaksinasi bilan emlandi
Malayziyada 12-maydan qariyb bir oyga lokdaun joriy qilinadi
Malayziya hukumati koronavirus tarqalishi munosabati bilan 12-maydan 7-iyungacha mamlakatda umummilliy izolyatsiya rejimini joriy etishga qaror qildi.Xususan, jamoat tadbirlari taqiqlanadi, restoranlarga borish, shtatlar va tumanlar ichida harakatlanish mumkin bo‘lmaydi (ish, shoshilinch holatlar, tibbiy sabablar, emlanish yoki turmush o‘rtog‘ini ko‘rishga borish kabi sabablar bo‘lmasa). Ochiq havoda sport bilan shug‘ullanish bo‘yicha ba’zi cheklovlar kiritiladi.
Worldometers statistik sayti ma’lumotlariga ko‘ra, Malayziyada pandemiya boshidan buyon 444,4 ming kishi koronavirusga chalingan, shularning 1,7 mingdan ortig‘i vafot etgan.
Shuningdek:
- AQShda Pfizer vaksinasi bilan o‘smirlarni emlash ma’qullandi. Endi 12 yoshdan oshgan amerikaliklar ushbu vaksinani olishi mumkin. Bundan tashqari, kompaniya o‘z dorisini olti oylikdan oshgan bolalarda sinovdan o‘tkazmoqda.
- Buyuk Britaniyada koronavirus cheklovlari yumshatilmoqda. 17-maydan mamlakatda pab, kafe va restoranlarning yopiq binolarida xizmat ko‘rsatish ochiladi, odamlar ochiq havoda ko‘pchilik bo‘lib to‘planib o‘tirishi mumkin bo‘ladi. Kinoteatr va sportzallar ham ochilishi mumkin. Hukumat o‘z yaqinlari bilan quchoqlashib ko‘rishmaslik tavsiyasini bekor qildi.
Izoh (0)