Тожикистон президенти Эмомали Раҳмон 10 май куни республика ҳукумат аъзолари, давлат раҳбарининг ижро аппарати ва бошқа давлат тузилмалари раҳбарияти билан амалий учрашув ўтказди.
Тожикистон—Афғонистон чегарасидаги мавжуд вазиятга алоқадор ҳолда, давлат раҳбари мамлакат хавфсизлик идоралари раҳбарларига зудлик билан давлат чегаралари муҳофазасини таъминлаш ҳамда жиноятчиликка, айниқса экстремизм, терроризм ва гиёҳванд моддалар савдосига қарши курашиш бўйича чораларни кучайтиришни буюрди.
Давлат раҳбари матбуот хизмати хабар беришича, бир кун олдин Эмомали Раҳмон Афғонистон президенти Муҳаммад Ашраф Ғанига ҳамдардлик телеграммасини юборди.
Ўзининг хабарида у «Кобулнинг ғарбий қисмида содир бўлган даҳшатли террорчилик ҳужуми натижасида тинч аҳоли, шу жумладан ёш қизлар орасида кўплаб қурбонлар ва жабрланганлар тўғрисидаги хабарни эшитиб, чуқур қайғу ва чексиз нафратга тўлганини» таъкидлаган.
«Муборак Рамазон ойининг сўнгги кунларида ёвуз кучлар томонидан қилинган бу шафқатсиз ва ҳалокатли зўравонлик ҳаракатини кечириб бўлмайди. Биз терроризм ва экстремизмнинг ҳар қандай кўринишини қатъиян қоралаймиз ва замонамизнинг ушбу глобал таҳдидларига қарши курашни кучайтириш зарурлигини яна бир бор таъкидлаймиз», — дейилади телеграммада.
Эмомали Раҳмон ўз номидан ва бутун Тожикистон халқи номидан қурбонларнинг қариндошлари ва дўстларига дилдан ҳамдардлик ва қўллаб-қувватлаш сўзларини изҳор этиб, барча жабрланганлар тезроқ соғайиб кетишини тилаган.
Аввалроқ Афғонистоннинг Забул вилоятида мина қўйилган йўлдан ўтаётган йўловчи автобусининг портлаши оқибатида камида 16 киши ҳалок бўлгани ҳақида хабар берилганди.
Бундан аввал, 8 май куни Кобулдаги қизлар мактабида бир нечта портлашлар содир этилган эди. Сўнгги маълумотларга кўра, ҳодисада 68 киши ҳалок бўлган, аксарияти 11-15 ёшдаги ўқувчи қизлар.
Афғонистон президенти Ашраф Ғани Кобулдаги портлашда «Толибон» жангари гуруҳини айблади. Айни вақтда «Толибон»нинг ўзи ҳам ушбу ҳужумни қоралади.
«Толибон» ҳаракати мусулмонларнинг муқаддас ойи — Рамазон якунида нишонланадиган ҳайит байрами муносабати билан уч кун давомида ҳарбий ҳаракатларни тўхташини эълон қилди.
Изоҳ (0)