Surxondaryo viloyati IIB Korrupsiya va iqtisodiy jinoyatlarga qarshi kurashish bo‘limi hamda Denov tumani IIO FMB JQB xodimlari fuqarolarga koronavirus infeksiyasi natijalari haqida soxta ma’lumotnoma tayyorlab beruvchi jinoiy guruh faoliyatiga chek qo‘ydi. Bu haqda viloyat IIB axborot xizmati xabar berdi.
Ma’lum qilinishicha, A.S. ismli fuqaro 1-may kuni Denov tumanidagi tibbiyot muassasalaridan birida ishlovchi tanishi P.D.ga uchrashib, koronavirus infeksiyasiga qarshi o‘zi va 7 nafar tanishi PZR-test topshirmoqchi ekanini aytgan. P.D esa hech qanday analiz olmasdan turib, COVID-19’ga PZR-test ma’lumotnomasini tayyorlab berish uchun ularning har biridan 150 ming so‘mdan jami 8 kishiga 1,2 million so‘m pul berishni talab qilgan.
Shundan so‘ng A.S. tanishining tamagirlik yo‘li bilan pul talab qilgan bu harakatlariga qonuniy chora ko‘rishni so‘rab, ichki ishlar organiga murojaat qilgan.
Mazkur arizaga asosan olib borilgan tezkor harakatlar chog‘ida P.D. tibbiyot muassasasining ma’muriy binosi ichida “mijozi” A.S.dan talab qilgan pulning 1 million so‘mini olib, uning 700 ming so‘mini o‘zi bilan birga ishlaydigan O. N.ga bergan vaqtida ushlangan.
Ayni paytda mazkur holat yuzasidan Denov tumani bo‘yicha ichki ishlar organlari faoliyatini muvofiqlashtirish boshqarmasi huzuridagi Tergov bo‘limi xodimlari tergovga qadar tekshiruv ishlarini olib bormoqda.
Avvalroq Qashqadaryoda PZR-testi natijalarini soxtalashtirgan xususiy klinika rahbari qo‘lga olingani, Andijonda soxta PZR-testlarni tayyorlab sotish bilan shug‘ullangan ikki maktab o‘quvchisi ushlangani hamda Farg‘onada soxta PZR-test ma’lumotnomasi va Rossiyada davolanish uchun taklifnoma sotish bilan shug‘ullangan shaxs qo‘lga olingani haqida xabar berilgandi.
Izoh (0)