Сурхондарё вилояти ИИБ Коррупция ва иқтисодий жиноятларга қарши курашиш бўлими ҳамда Денов тумани ИИО ФМБ ЖҚБ ходимлари фуқароларга коронавирус инфекцияси натижалари ҳақида сохта маълумотнома тайёрлаб берувчи жиноий гуруҳ фаолиятига чек қўйди. Бу ҳақда вилоят ИИБ ахборот хизмати хабар берди.
Маълум қилинишича, А.С. исмли фуқаро 1 май куни Денов туманидаги тиббиёт муассасаларидан бирида ишловчи таниши П.Д.га учрашиб, коронавирус инфекциясига қарши ўзи ва 7 нафар таниши ПЗР-тест топширмоқчи эканини айтган. П.Д эса ҳеч қандай анализ олмасдан туриб, COVID-19’га ПЗР-тест маълумотномасини тайёрлаб бериш учун уларнинг ҳар биридан 150 минг сўмдан жами 8 кишига 1,2 миллион сўм пул беришни талаб қилган.
Шундан сўнг А.С. танишининг тамагирлик йўли билан пул талаб қилган бу ҳаракатларига қонуний чора кўришни сўраб, ички ишлар органига мурожаат қилган.
Мазкур аризага асосан олиб борилган тезкор ҳаракатлар чоғида П.Д. тиббиёт муассасасининг маъмурий биноси ичида «мижози» А.С.дан талаб қилган пулнинг 1 миллион сўмини олиб, унинг 700 минг сўмини ўзи билан бирга ишлайдиган О. Н.га берган вақтида ушланган.
Айни пайтда мазкур ҳолат юзасидан Денов тумани бўйича ички ишлар органлари фаолиятини мувофиқлаштириш бошқармаси ҳузуридаги Тергов бўлими ходимлари терговга қадар текширув ишларини олиб бормоқда.
Аввалроқ Қашқадарёда ПЗР-тести натижаларини сохталаштирган хусусий клиника раҳбари қўлга олингани, Андижонда сохта ПЗР-тестларни тайёрлаб сотиш билан шуғулланган икки мактаб ўқувчиси ушлангани ҳамда Фарғонада сохта ПЗР-тест маълумотномаси ва Россияда даволаниш учун таклифнома сотиш билан шуғулланган шахс қўлга олингани ҳақида хабар берилганди.
Изоҳ (0)