“O‘zbekiston temir yo‘llari” Qozog‘iston va Rossiyaga temiryo‘l qatnovini tiklashi mumkin

“O‘zbekiston temir yo‘llari” AJ xalqaro temiryo‘l qatnovlarini bosqichma-bosqich tiklash bo‘yicha Qozog‘iston va Rossiya temiryo‘l ma’muriyatlariga murojaat yubordi. Bu haqda 7-may kuni Milliy matbuot markazida bo‘lib o‘tgan matbuot anjumanida xabar berildi.

Ma’lum qilinishicha, ushbu murojaat har ikki davlatning vakolatli davlat organlari tomonidan o‘rganib chiqilmoqda va yaqin kelajakda amalga oshirilishi mumkin.

Shuningdek, mamlakat aholisi uchun qo‘shimcha qulayliklar yaratish, ichki turizmni rivojlantirish maqsadida yo‘lovchilarning takliflari o‘rganib chiqilib, hududlarda yangi yo‘nalishlar ochilgan. Xususan:

• Termiz—Xiva—Termiz;
• Andijon—Nukus—Andijon;
• Toshkent —Namangan—Andijon;
• Andijon—Namangan—Toshkent;
• Andijon—Xiva—Andijon;
• Toshkent—Olot—Toshkent;
• Toshkent—Shovot yo‘nalishlarida poyezdlar qatnovi yo‘lga qo‘yildi.

Shuningdek, 2021-yilda ikkita tezyurar “Afrosiyob” poyezdi olib kelinadi. “Shuni alohida ta’kidlash kerakki, mamlakatning tog‘li sharoiti og‘ir hududlarida tezyurar poyezdlar qatnamaydi, chunki ushbu modifikatsiyadagi poyezdni bunday uchastkalarda ishga tushirish maqsadga muvofiq emas, ular bunday hududlarda yuqori tezlikda harakatlana olmaydi”, — deyiladi xabarda.