Namanganda sel ayrim yo‘llarga zarar yetkazishi oqibatida transport harakati cheklanadi, deya xabar qilmoqda YHXBB matbuot xizmati.
Ma’lum qilinishicha, 2021-yil 6-may kuni soat 17:20 larda Namangan viloyatining ayrim yo‘llarida suv toshqini oqibatida transportlar harakati cheklanadi.
Xususan, Pop tumani “Nayman” QFY hududidan o‘tgan 4R-126 yo‘lidagi harakat Baliqchi—Mingbuloq—Nayman—Pungon avtomobil yo‘li (Qo‘qon shahriga olib boruvchi) orqali tashkil etilgan.
Shuningdek, Pop—Qo‘shminor 2 temiryo‘l bekatlari oralig‘ining 106-kilometrida temiryo‘l izini loy aralashmasi ko‘mib tashlagani sababli temiryo‘lda poyezdlar harakati cheklandi.
“O‘zbekiston temiryo‘llari” kompaniyasining xabar berishicha, 7-may kuni Toshkent—Andijon yo‘nalishi bo‘yicha 60-sonli poyezd reysi bekor qilingan. Yo‘lovchilar sotib olgan chiptalarning puli to‘liq qiymatda vokzallar chiptaxonalarida qaytariladi yoki boshqa sanaga almashtirilishi mumkin.
Mazkur holat Farg‘ona vodiysiga va u yerdan boshqa viloyatlarga harakatlanayotgan barcha yo‘lovchi poyezdlarning harakat jadvaliga ham ta’sir ko‘rsatishi mumkinligi ta’kidlangan.
Bundan avval Samarqandda kuchli yomg‘ir ko‘chalarni yana suvga to‘ldirgani hamda kuchli yomg‘ir sababli Damas soyga tushib ketgani haqida xabar berilgandi.
Izoh (0)